Сепаратысты разграмілі станцыю метро ў Харкаве

Прарасейскія экстрэмісты разбівалі шкло ў кіёсках у пераходах і разбуралі турнікеты. Ужывалі слезацечны газ.

Пра гэта «Аб'ектыў - навінам» паведаміў чалавек, які прадставіўся супрацоўнікам СБУ. У той момант мужчына знаходзіўся на службе. З ягоных слоў, на платформу метро тады зайшлі некалькі сотняў «майданаўцаў», а за імі - прадстаўнікі іншага лагера. У мітусні людзі гублялі рэчы і мабільныя тэлефоны. Частка актывістаў з украінскай сімволікай паспелі з'ехаць на цягніку. Астатніх ахоўвалі міліцыянты і супрацоўнікі спецпадраздзяленняў. 15 чалавек, сярод якіх былі дашкольнікі, зачынілі ў тэхнічныя памяшканні для бяспекі. Дваіх «еўрамайданаўцаў» з разбітай галавой і колата-рэзанымі ранамі вывелі з метро і павезлі на «хуткай». Ёсць і пацярпелыя праваахоўнікі. Цяпер яны знаходзяцца ў бальніцы, паведаміла крыніца.

Бойка паміж «майданаўцамі» і прарасейскімі актывістамі ля метро «Універсітэт» непадалёк ад Палаца дзіцячай і юнацкай творчасці пачалася ля паловы на трэцюю. Пасля традыцыйнага мітынгу ля помніка Шаўчэнку людзі збіраліся раз'язджацца. Ля метро іх атачылі прарасейскія мітынгоўцы. Са слоў супрацоўніка СБУ, з натоўпу з георгіеўскімі стужачкамі ў «еўрамайданаўцаў» паляцелі светлашумавыя гранаты і тратуарная плітка. Акрамя таго, раз'юшаны натоўп ужываў дубінкі і траўматычную зброю, распавяла крыніца. Яна адзначыла, што міліцыя ў гэты момант адступіла і бяздзейнічала.

Як паведамілі ў метро, уваход і выхад на станцыі «Гаспром» і «Універсітэт» часова зачыненыя.