У Гродна даішнік ганяўся за пешаходам (Відэа)

На днях на праспекце Кляцкова ў Гродна гараджане сталі відавочцамі пагоні за пешаходам.

Хлопец дачакаўся, пакуль міма яго праедзе аўтамабіль ДАІ, і пачаў пераходзіць дарогу ў неналежным месцы. Аднак інспектары развярнуліся і паехалі насустрач парушальніку. Калі яны вярнуліся, малады чалавек стаяў на падзяляльнай паласе і ўжо збіраўся пераходзіць другую праезную частку. Ён стаў уцякаць ад супрацоўніка ДАІ, які не раздумваючы пабег за ім. Другі інспектар уключыў сігналізацыю і паехаў на дапамогу праз двары мікрараёна, піша autogrodno.by.

«Пешахода заўважылі каля праезнай часткі загадзя і сталі сачыць за ім у люстэрка задняга віду, - пракаментавалі інспектары. - Спачатку думалі, што чалавек проста стаіць каля праезнай часткі, але калі ён стаў пераходзіць дарогу, інспектары развярнуліся і паехалі яму насустрач. Адзін з супрацоўнікаў заўважыў, маўляў, тут нельга пераходзіць, але парушальнік пачаў уцякаць. З'явіліся падазрэнні, што мужчына можа быць злачынцам і знаходзіцца ў вышуку».

Падчас пагоні праз двары мікрараёна мінакі пачалі дапамагаць злавіць парушальніка. «Адзін з мужчын з калыскай нават паспрабаваў схапіць чалавека, - дапоўнілі ў ДАІ. - У рэшце рэшт парушальніка затрымалі. Ён апынуўся п'яным. У яго крыві выявілі 0,9 праміле алкаголю. На мужчыну быў складзены адміністрацыйны пратакол па артыкуле 18.23 (парушэнне ПДР пешаходам у стане алкагольнага ап'янення)».