ЗША разглядаюць пытанне аб ўзбраенні арміі Украіны

Вашынгтон не выключае магчымасці пастаўкі ўзбраенняў для ўкраінскай арміі.

«Мы разглядаем гэта як варыянт, - заявіў амерыканскі дыпламат, дарадца дзяржсакратара Томас Шэнан у Берліне, паведамляе Deutsche Welle. - Але яшчэ не вядома, будзем мы гэта рабіць ці не».

Украінскі ўрад нядаўна звярнуўся да амерыканскага з просьбай аб пастаўках зброі ва Украіну. Пра гэта заявілі ўрадавыя колы ЗША. Зараз, калі сітуацыя ва Украіне значна пагоршылася, у Вашынгтоне задумаліся аб такім варыянце падтрымкі ўкраінскай арміі.

Томас Шэнан выказаў глыбокую занепакоенасць вельмі напружанай сітуацыяй на ўсходзе Украіны.

«Тое, што мы зараз назіраем у цэлым шэрагу гарадоў на ўсходзе Украіны, падобна на тое, што адбылося ў Крыме...Гэта тычыцца як тактыкі, так і людзей, якія бяруць у гэтым удзел», - растлумачыў дыпламат. На яго думку, Расея цалкам відавочна адыгрывае пэўную ролю ў падзеях, якія дэстабілізуюць Украіну.

На пытанне журналістаў, ці хоча Расея акупаваць усходнюю Украіну, амерыканскі дыпламат адказаў: «Тое, што мы зараз назіраем ва ўсходняй Украіне, мы назіралі і ў Крыме, таму гэтыя падзеі выклікаюць трывогу і з'яўляюцца небяспечнымі». У ЗША мяркуюць, што, ва ўсякім разе, частка жаўнераў без апазнавальных знакаў на ўніформе, якія дзейнічаюць ва Украіне, - расейцы, растлумачыў дыпламат. У падзеях ва ўсходняй Украіне цалкам выразна прасочваецца «почырк расейскай аперацыі», дадаў Томас Шэнан.

23 сакавіка старшыня камітэта ў справах выведкі Палаты прадстаўнікоў Кангрэсу ЗША Майк Роджэрс заклікаў улады ЗША забяспечыць Узброеныя сілы Украіны зброяй для абароны ад магчымай агрэсіі Расеі на ўсходнія рэгіёны.

Фота: DW