Арсень Яцэнюк: Задача тэрарыстаў на ўсходзе - знішчэнне Украіны

Прэм'ер-міністр Украіны запрасіў да ўдзелу ў працэсе змяненняў у Канстытуцыю палітычныя эліты ўсходу краіны.

Тэрарыстаў ва ўсходніх рэгіёнах Украіны не цікавяць правы мясцовых жыхароў, іх мэта - знішчэнне ўкраінскай дзяржаўнасці. Як паведамляе карэспандэнт ЛІГАБізнесІнформ, пра гэта заявіў прэм'ер-міністр Украіны Арсень Яцэнюк, які выступіў на пасяджэнні канстытуцыйнай камісіі. Ён адзначыў, што ўрад прапанаваў канцэпцыю рэфармавання мясцовага самакіравання з прадстаўленнем уладзе на месцах рэальных правоў, а таксама магчымасцяў фінансавання. Яцэнюк нагадаў, што праект прадугледжвае ліквідацыю абласных і раённых адміністрацый і перадачу іх функцый выканаўчым камітэтам, якія будуць абраныя на месцах. Прадугледжаны змены ў бюджэтны і падатковы кодэксы, а таксама рэформа цэнтральнай выканаўчай улады і іх падраздзяленняў на месцах з ліквідацыяй дублюючых функцый.

«Вымушаны канстатаваць, што, нягледзячы на тое, што ўрадам выразна заяўлены прынцыпы рэфармавання мясцовага самакіравання, нягледзячы на заявы, што мы абаранялі і будзем абараняць правы нацыянальных меншасцяў, правы расейскамоўнага насельніцтва, правы кожнай тэрыторыі кожнага грамадзяніна Украіны, на жаль, тыя тэрарысты, якія знаходзяцца сёння на ўсходзе Украіны, выйшлі не за правы жыхароў Данецка, Луганску, Харкава, якой-небудзь іншай вобласці. Яны выйшлі толькі з адной мэтай - раскалоць краіну і знішчыць украінскую дзяржаўнасць», - падкрэсліў Яцэнюк.

У сувязі з гэтым ён заявіў, што ўрад Украіны звяртаецца да ўсіх палітычных сілаў з тым, каб разам працаваць над канстытуцыйнай рэформай, новым бюджэтным і падатковым кодэксам, перадачай паўнамоцтваў і фінансавага рэсурсу рэгіёнам, скарачэннем уплыву цэнтральнай улады на мясцовае самакіраванне.

«Спадзяюся, што палітычныя эліты, якія прадстаўляюць усходнюю Украіну, возьмуць самы актыўны ўдзел у працэсе змяненняў у Канстытуцыю ў працэсе захавання Украіны як адзінай, унітарнай і цэласнай дзяржавы», - сказаў Яцэнюк і дадаў, што ўрад гатовы выканаць усе пастановы Вярхоўнай Рады, якія будуць адлюстроўваць інтарэсы ўкраінскага народа.