Апалчэнец з Нікалаева: Калі сунуцца «зялёныя чалавечкі» - пераб'ем іх за 15 хвілін

Адзін з лідараў Народнага апалчэння Нікалаева Аляксандр Янцэн заявіў пра гатоўнасць прыняць рашучыя меры для абароны горада.

Пра гэта ён сказаў у эфіры «Громадьского ТВ».

Як заявіў Аляксандр Янцэн, ён ужо паведаміў начальніку УМВД Украіны ў Нікалаеўскай вобласці генералу Юрыю Сяднёву пра тое, што актывісты не будуць стаяць у баку ў выпадку з'яўлення ў горадзе прарасейскіх баявікоў. Апалчэнец заявіў, што калі міліцыя і ўлада будуць бяздзейнічаць, то гараджане ўжывуць зброю супраць «зялёных чалавечкаў», піша «Обозреватель».

«Мы ж разумеем, што мясцовыя ўлады дублююць дзеянні дзяржаўнай улады. Калі яны не ў стане прымаць ніякіх рашэнняў, калі гэта людзі без стрыжня, калі гэтыя людзі забыліся, што яны мужчыны і галоўны абавязак мужчыны - абараняць свае сем'і, то мы гэтую функцыю возьмем на сябе», - сказаў Янцэн.

«Учора мы прыйшлі да нашага кіраўніка абласной міліцыі, я трохі паслухаў тую размову, яны казалі, што рабіць. Я паслухаў і адкрыта заявіў: хлопцы, мы не будзем чакаць, пакуль вы атрымаеце нейкі загад. Калі ў нашым горадзе з'явяцца «зялёныя чалавечкі», я збяру тых людзей, у якіх ёсць ужо зброя, і мы проста іх пераб'ем на працягу 15 хвілін. Гэта будзе проста адэкватны адказ адных «зялёных чалавечкаў» на дзеянні іншых «зялёных чалавечкаў». Гэта наша зямля, ніхто не мае права прыходзіць сюды і чыніць вось гэта скотства. Мы абаронім свае сем'і. Нам сёння пагражаюць. Мы яшчэ на сённяшні дзень не збілі на вуліцы ніводнага чалавека. Ні з «каларадскай» стужачкай, ні з расейскімі сцягамі», - заявіў у прамым эфіры Янцэн.

Раней начальнік ГУ МУС Украіны ў Адэскай вобласці заявіў пра стварэнне спецпадраздзялення міліцыі «Шторм», у задачы якога будзе ўваходзіць забеспячэнне абароны і аховы жыцця, правоў і свабод і законных інтарэсаў грамадзян, грамадства і дзяржавы ад злачынных і іншых замахаў, аховы грамадскага парадку і забеспячэння грамадскай бяспекі.