Інвестыцыі ў расейскую нерухомасць абваліліся на 70%

Інвестыцыі ў камерцыйную нерухомасць у Расеі ў I квартале знізіліся на 73,5% у параўнанні з тым жа перыядам мінулага года, падлічылі аналітыкі кампаніі CBRE.

Агульная сума здзелак знізілася з 2,4 млрд дал да 636 млн дал. Падвялі - Украіна і слабы рубель, лічаць эксперты.

Выдаткі інвестараў на куплю камерцыйнай нерухомасці ў першыя тры месяцы гэтага года склалі ўсяго 636 млн дал, або 26,5% ад узроўня I квартала 2013г., гаворыцца ў справаздачы CBRE. Увесь рынак знаходзіўся пад ціскам імклівай спекулятыўнай атакі на рубель і геапалітычных падзей, лічаць аналітыкі кампаніі. Пераглядаць агульнагадавы прагноз CBRE збіраецца ў II квартале 2014 года, паведамляе РБК.

Кампанія JLL свой прагноз па гадавым аб'ёме інвестыцый у камерцыйную нерухомасць у Расеі ўжо перагледзела, знізіўшы яго з 7 млрд дал. адразу да 3,4 млрд дал. Такое рашэнне тлумачылася "стрэсавай сітуацыяй у эканоміцы і нявызначанасцю ў настроі інвестараў".

Калі прагноз спраўдзіцца, 2014 год апынецца самым няўдалым для сектара камерцыйнай нерухомасці пачынаючы з 2009г. Тады ўкладанні ў рынак нерухомасці Расеі склалі 3,2 млрд дал., адзначыў кіраўнік аддзела даследаванняў JLL Том Мандзі, але пры павелічэнні дзелавой актыўнасці да ліпеня яшчэ магчымае змяненне прагнозу на больш спрыяльны.

"Зніжэнне інвестыцыйнай актыўнасці выклікана ваганнямі курсаў валют, і большасць інвестараў чакаюць стабілізацыі становішча на валютным рынку перш, чым яны працягнуць працэс закрыцця бягучых і новых здзелак", - гаворыцца ў справаздачы Colliers International. Яшчэ адным фактарам, які паўплываў на зніжэнне актыўнасці, стала прамое ўцягванне Расеі ў палітычны крызіс на Украіне і негатыўная рэакцыя заходніх краін на яго, лічаць аналітыкі гэтай кампаніі. Паводле іх дадзеных, у студзені-сакавіку 2014 года ў расейскую камерцыйную нерухомасць было ўкладзена 642 млн дал. (35% ад аб'ёмаў I квартала 2013г.).

Глабальны рынак нерухомасці працягвае расці. Па падліках экспертаў JLL, у I квартале 2014г. аб'ём прамых інвестыцый у камерцыйную нерухомасць у свеце дасягнуў 130 млрд дал., павялічыўшыся на 23% у параўнанні з леташнім вынікам за той жа перыяд.