Гродзенец адпомсціў жонцы і сеў п'яным за руль яе машыны

Жыхар Гродна пасварыўся з жонкай і вырашыў адпомсціць.

П'яным ён сеў за руль зарэгістраванага на жонку аўтамабіля і праехаў на ім на высокай хуткасці, паведамляе "Вечерний Гродно".

Нецвярозага кіроўцу 34 гадоў затрымалі супрацоўнікі ДАІ. Як растлумачылі ў прэс-службе ведамства, парушальнік не адразу выканаў патрабаванне інспектараў аб спыненні. Яго затрымалі на гарадскім праспекце. Утрыманне алкаголю ў арганізме кіроўцы ў сем разоў перавысіла дапушчальную лічбу. Даваць тлумачэнні і падпісваць пратаколы затрыманы адмовіўся.

Мужчыну ўжо ў чацвёрты раз за апошнія тры гады затрымліваюць п'яным за рулём. Зараз зарэгістраваная на жонку "Пежо" падлягае канфіскацыі.

24 кастрычніка 2013 года ў сілу ўступіў Закон "Аб унясенні змяненняў і дапаўненняў у некаторыя кодэксы Рэспублікі Беларусь па пытаннях узмацнення мер адказнасці за кіраванне транспартным сродкам у стане ап'янення". Паводле яго, у паўторным выпадку кіравання аўтамабілем у стане ап'янення на працягу года аўтамабіль падлягае канфіскацыі. Аўто забіраюць у парушальніка па-за залежнасці ад таго, хто яго ўласнік. Выключэнне складаюць толькі выпадкі незаконнага прысваення аўтамабіля, напрыклад, пры згоне.