Дзярждума скасавала выбары мэраў у 67 гарадах Расеі

Дзярждума прыняла законапраект, паводле якога плануецца скасаваць наўпроставыя выбары мэраў буйных гарадоў краіны.

У іх увядуць пасаду прызначанага кіраўніка адміністрацыі, паведамляе BBC.

За праект паправак да закона "Аб агульных прынцыпах арганізацыі мясцовага самакіравання" прагаласавалі 237 дэпутатаў. Супраць праекту выступілі фракцыі камуністаў, чый дэпутат Анатоль Локаць толькі што перамог на выбарах мэра Новасібірска, і "Справядлівай Расеі".

Апазіцыя мяркуе, што новы закон прыдуманы толькі для таго, каб развязаць праблему частых канфліктаў паміж губернатарамі і мэрамі рэгіянальных сталіц, фактычна - каб выключыць магчымасць з'яўлення незалежных ад "вертыкалі ўлады" мэраў ў буйных гарадах.

Аўтары закона - два з паловай дзясяткі дэпутатаў ад "Адзінай Расеі" - аднак, тлумачаць сваю ініцыятыву жаданнем, у адпаведнасці з наказамі прэзідэнта, зрабіць гарадскія ўлады бліжэйшымі да народа.

У тлумачальнай запісцы да законапраекта аўтары спасылаюцца на апошняе пасланне прэзідэнта Федэральнаму сходу, у якім той "пазначыў задачу ўдасканалення агульных прынцыпаў арганізацыі мясцовага самакіравання, развіцця моцнай, незалежнай, фінансава заможнай улады на месцах", прытым улады, наладжанай так, каб "кожны грамадзянін мог дацягнуцца да яе рукой".

"У буйных мегаполісах слаба кантралюемая гарадской супольнасцю агульнагарадская муніцыпальная ўлада, якая мае значныя матэрыяльныя і фінансавыя рэсурсы, аддалена ад насельніцтва, таму нярэдка была малаэфектыўная для забеспячэння жыццядзейнасці насельніцтва, яе дзейнасць суправаджалася карупцыйнымі скандаламі, мелі месца выпадкі нямэтавага выкарыстання бюджэтных сродкаў, сумнеўнай прыватызацыі камунальнай маёмасці і г.д.", - скардзяцца дэпутаты.

Таму ў буйных гарадах - такіх, якія дзеляцца на раёны - аўтары праекта прапануюць увесці новыя адзінкі самакіравання: "гарадская акруга з унутрыгарадское дзяленне" і "унутрыгарадскі раён".

Выбары захаваюцца толькі ў раёне - там гараджане будуць фармаваць раённыя рады. Гэтыя рады будуць самі абіраць дэлегатаў у агульнагарадскую раду, а тая стане выбіраць са свайго складу кіраўніка гарадскога акругі.

Пры гэтым паўнамоцтвы кіраўніка будуць абмежаваныя, а ўсе гаспадарчыя пытанні будзе вызначаць кіраўнік адміністрацыі, прыняты на працу праз конкурс.

Раней адзін з аўтараў праекта, кіраўнік камітэта Савета Федэрацыі па пытаннях мясцовага самакіравання Сцяпан Кірычук казаў, што рэформа закране 67 буйных гарадоў Расеі, у асноўным - рэгіянальных цэнтраў.

Масква і Санкт-Пецярбург, як асобныя суб'екты федэрацыі, пад дзеянне закона не падпадаюць.

Фота: Reuters