Пад Брэстам п'яны мужчына скраў Renault з пасажырамі

23-гадовы п'яны згоншчык не заўважыў у салоне людзей і паспрабаваў скрасці аўтамабіль.

Пасажыры ўгаварылі няўдачлівага згоншчыка вярнуць машыну ўладальніку.

У ноч з 14 на 15 красавіка некалькі чалавек на Renault заехалі на запраўку на аўтадарозе М1 каля вёскі Хабы Брэсцкай вобласці. Кіроўца аўтамабіля выйшаў у краму. Машыну ён не зачыніў і пакінуў у замку запальвання ключы, бо на заднім сядзенні знаходзіліся пасажыры, піша БелаПАН.

Прыкладна ў 00:30 п'яны мужчына залез на кіроўчае сядзенне. Пасажыраў у салоне ён не заўважыў, а завёў машыну і выехаў на трасу з тэрыторыі АЗС, паведамляе прэс-служба УУС Брэсцкага аблвыканкама. Аднак пасажыры змаглі ўгаварыць маладога чалавека вярнуць аўтамабіль. Згоншчык менавіта так і паступіў, і ўжо праз пяць хвілін у 0:35 машына вярнулася да свайго законнага ўладальніка.

Хлопец паспрабаваў схавацца, але ў хуткім часе яго затрымалі супрацоўнікі міліцыі. За ўчыненае злачынства, якое класіфікуецца па ч.1 арт.214 КК РБ (Згон транспартнага сродку), няўдачліваму згоншчыку пагражае да пяці гадоў пазбаўлення волі.