Баевікі захапілі пажарныя аўтамабілі ў Славянску

Сепаратысты перашкаджаюць працаваць выратавальнікам у Данецкай вобласці, чым ставяць пад пагрозу дабрабыт і жыцці людзей.

Ратавальнікі заклікаюць жыхароў Данецкай вобласці, усіх грамадзян не перашкаджаць выкананню пажарна-выратавальнымі падраздзяленнямі прафесійных абавязкаў - выратаванню людзей, забеспячэнню аператыўнага выезду пажарна-выратавальнай тэхнікі і праезду да месцаў здарэнняў, тушэнню пажараў.

Адпаведная заява Дзяржаўнай службы Украіны па надзвычайных сітуацыях размешчаная на афіцыйным сайце ведамства ў сераду.

У заяве адзначаецца, што ў сераду ў 11.50 на тэрыторыю 38-й пажарна-выратавальнай часткі Славянск Данецкай вобласці зайшлі людзі са зброяй з патрабаваннем аддаць спецыяльныя пажарныя аўтамабілі "пратэстоўцам".

"Асабісты склад часткі адмовіўся выконваць наступныя патрабаванні. Тады, сілай быў захоплены рэзервовы пажарны аўтамабіль і вывезены за межы часткі з мэтай выкарыстання гучнай сувязі для агітацыі насельніцтва", - адзначаецца ў заяве.

У 12.20, па дадзеных ДСНС, аўтамабіль быў вернуты да месца дыслакацыі часткі.

"Нагадваем, што асабісты склад і пажарна-выратавальная тэхніка ДСНС Украіны знаходзіцца на пастаянным кругласутачным дзяжурстве. Ратавальнікі, згодна з заканадаўствам Украіны і міжнароднымі канвенцыямі, у прыватнасці Жэнеўскай, не маюць стралковай зброі. Іх зброя - аварыйна-выратавальнае абсталяванне. Пажарныя ратуюць чалавечыя жыцці і маёмасць падчас пажараў у жылым сектары, на вытворчасці, выязджаюць на тушэнне маштабных узгаранняў на адкрытых тэрыторыях і г.д. Менавіта ад аператыўнасці дзеянняў пажарна-выратавальных падраздзяленняў залежыць жыццё людзей, якія чакаюць выратавання", - падкрэслілі ў ДСНС.

У ведамстве адзначаюць, што фактары ўскладнення нясення службы адбіваюцца на працы асабістага складу падраздзяленняў ДСНС Украіны ў Данецкай вобласці.

"Але, нягледзячы на складанасць сітуацыі, ратавальнікі не могуць аслабіць пазіцыі нясення службы. Бо ад іх працы - аператыўнасці, прафесіяналізму і зладжанасці дзеянняў - залежаць чалавечыя жыцці, здароўе і дабрабыт грамадзян, стабільнасць і эканамічны рост рэгіёну", - падкрэсліваюць у ведамстве.

Нагадаем, з 6 красавіка расейскія дыверсійныя групы і мясцовыя сепаратысты пачалі планамерныя захопы будынкаў адміністрацый ва ўсходніх абласцях Украіны, а таксама ўпраўленняў МУС і СБУ, якія прывабліваюць баевікоў зброевым арсеналам.

У адказ улады Украіны прынялі рашэнне аб пачатку антытэрарыстычнай аперацыі ва ўсходніх рэгіёнах краіны. На Данбас перакінулі вайскоўцаў і тэхніку.

15 красавіка ў выніку аперацыі ўкраінскіх сілавікоў быў вызвалены захоплены расейскімі дыверсантамі і сепаратыстамі горад Краматорск на поўначы Данецкай вобласці.