Moody's: Эканоміку Расеі чакае рэцэсія

Актывы банкаў пагоршацца, рост крэдытавання рэзка замарудзіцца.

Пра гэта гаворыцца ў апублікаванай у сераду справаздачы міжнароднага рэйтынгавага агенцтва Moody's Investor's Service, піша «Інтэрфакс».

Яшчэ ў сакавіку агенцтва Moody's паказвала, што ў 2014 годзе расейскі ВУП можа скараціцца прыблізна на 1%, паколькі назіральная ў апошні час валацільнасць фінансавых рынкаў узмацняе запаволенне тэмпаў эканамічнага росту, якое пачалося ў 2011 годзе.

Пагаршэнне ўмоў дзейнасці знаходзіць сваё адлюстраванне ў тым, што агенцтва Moody's на працягу пэўнага перыяду часу падтрымлівае негатыўны прагноз развіцця расейскай банкаўскай сістэмы. Гэты ж фактар з'явіўся адной з прычын нядаўняга ажыццяўлення агенцтвам шэрагу негатыўных рэйтынгавых дзеянняў у дачыненні да расейскіх банкаў.

Справаздача Moody's, азагалоўленая "Пагаршэнне эканамічнай сітуацыі ў Расеі акажа негатыўны ўплыў на якасць актываў і прыбытковасць расейскіх банкаў (Economic outlook in Russia will put pressure on banks' asset quality and profitability), паказвае, што ў 2014 годзе агенцтва чакае зніжэння тэмпаў росту крэдытавання прыблізна да 10%. У 2013 годзе рост крэдытавання дасягаў 17%, у 2011-2012 гадах - 20-30%.

У сваю чаргу, запаволенне росту можа выявіць слабыя месцы ў крытэрах і практыцы крэдытавання, што прымяняліся раней асобнымі банкамі. Крэдытным партфелям банкаў, якія дэманстравалі ў апошнія гады самыя хуткія тэмпы росту, уласцівая павышаная нявызначанасць якасці актываў, таму такія банкі асабліва адчувальныя да пагаршэння макраэканамічнага сцэнара, адзначае Moody's.

Калі глядзець па асобных сегментах, то спажывецкія крэдыты і крэдыты, выдадзеныя прадпрыемствам малога і сярэдняга бізнесу, знаходзяцца ў зоне найбольшай рызыкі.

Аднак, на думку агенцтва Moody's, зніжэнне прыбытковасці карпаратыўных пазычальнікаў і запаволенне росту даходаў прыватных асоб, а таксама павышэнне адсоткавых ставак па некаторых відах крэдытаў пацягнуць за сабой пагаршэнне якасці актываў ва ўсіх сегментах крэдытавання.

Акрамя таго, павелічэнне рэзерваў на магчымыя страты па пазыках прывядзе да зніжэння прыбытковасці банкаў. Пры нізкім попыце на крэдыты ва ўсіх сегментах, акрамя спажывецкага крэдытавання, банкі могуць толькі ў абмежаванай ступені перакласці на плечы пазычальнікаў павышэнне кошту фандавання, выкліканае павышэннем Цэнтрабанкам стаўкі рэфінансавання і ростам прэміі за рызыку для расейскіх банкаў ва ўмовах бягучай валацільнасці. Нягледзячы на тое, што ўзровень прыбытковасці банкаў негатыўна паўплывае на іх здольнасць нарошчваць капітал, агенцтва Moody's не чакае далейшага скарачэння дастатковасці капіталу, паколькі зніжэнне рэнтабельнасці капіталу будзе кампенсавана запаволеннем росту крэдытавання. Пры гэтым Moody's адзначае, што ў апошнія гады паказчыкі дастатковасці капіталу скараціліся ў выніку імклівага росту крэдытавання.

Расейскім банкам прыйдзецца прыстасоўвацца да новых умоваў працы, якія будуць мець больш высокі ўзровень крэдытнай рызыкі, павышэнне канкурэнцыі за прыцягненне найбольш крэдытаздольных пазычальнікаў і зніжэнне прыбытковасці, лічаць аналітыкі агенцтва. Лягчэй іншых з гэтымі цяжкасцямі справяцца банкі, якія маюць высокі запас трываласці дзякуючы больш высокаму ўзроўню капіталу, адэкватна сфармаваным рэзэрвам і стабільнаму аперацыйнаму даходу.

Банкам, якія маюць нізку кошт фандавання і нізкі ўзровень аперацыйных выдаткаў, таксама будзе лягчэй справіцца з надыходзячымі цяжкасцямі. Агенцтва Moody's мяркуе, што новыя ўмовы дадуць перавагі буйным дзяржаўным банкам і створаць стымулы для далейшай кансалідацыі банкаўскага сектара, асабліва ў сегменце буйных прыватных банкаў.