У Славянску баевікі працягваюць блакаваць 6 БМД

У Славянску Данецкай вобласці ўзброеныя экстрэмісты працягваюць блакаваць 6 адзінак тэхнікі (БМД) Узброеных сіл Украіны, захопленых напярэдадні.

Пра гэта УНІАН паведамілі ў прэс-службе Міністэрства абароны Украіны.

Асабісты склад і экіпажы гэтых баявых машын, сярод якіх большасць, - прызваныя падчас мабілізацыі ваеннаабавязаныя, адбылі да месца пастаяннай дыслакацыі ў Днепрапятроўскай вобласці, гаворыцца ў паведамленні.

Акрамя таго, па дадзеных Мінабароны, 15 адзінак браняванай тэхнікі (БМД), якія былі заблакаваныя па-прарасейску настроенымі актывістамі каля пасёлка Пчолкіна на паўднёвай ускраіне Краматорска, па стане на 08.00 17 красавіка вяртаюцца да месца пастаяннай дыслакацыі ў Днепрапятроўскай вобласці.

Перамовы аб дэблакаванні ўкраінскага воінскага падраздзялення з прысутнымі, сярод якіх знаходзіліся асобы ва ўніформе, у масках і са зброяй, правёў камандуючы высокамабільнымі дэсантнымі войскамі Узброеных сіл Украіны палкоўнік Аляксандр Швец.

У выніку перамоваў вайскоўцы выйшлі з акружэння з асабістай зброяй і на штатнай тэхніцы, адзначаецца ў паведамленні.

«З мэтай пазбягання ахвяраў сярод грамадзянскага насельніцтва, вайскоўцы аддалі замкі ад часткі стралковай зброі камандуючаму ПДВ, які выступіў гарантам непрымянення зброі супраць мясцовых жыхароў, якія выкарыстоўваюцца ўзброенымі экстрэмістамі ў якасці жывога шчыта», - паведамілі ў Мінабароны.

За час блакавання сутыкненняў з мясцовымі жыхарамі не было, дадалі ў прэс-службе.

Нагадаем, з 6 красавіка расейскія дыверсійныя групы і мясцовыя сепаратысты пачалі планамерныя захопы будынкаў адміністрацый ва ўсходніх абласцях Украіны, а таксама ўпраўленняў МУС і СБУ, якія прывабліваюць баевікоў зброевым арсеналам.

У адказ улады Украіны прынялі рашэнне аб пачатку антытэрарыстычнай аперацыі ва ўсходніх рэгіёнах краіны. На Данбас перакінулі вайскоўцаў і тэхніку.

15 красавіка ў выніку аперацыі ўкраінскіх сілавікоў быў вызвалены захоплены расейскімі дыверсантамі і сепаратыстамі аэрадром горада Краматорск на поўначы Данецкай вобласці.

17 красавіка ўкраінскія вайскоўцы адбілі атаку сепаратыстаў пад кіраўніцтвам афіцэраў ГВУ на вайсковую частку ў Марыупалі на поўдні Данецкай вобласці. Трое нападнікаў былі забітыя, больш за 60 затрыманыя.