Заснавальнік АC/DC пакідае гурт

Гітарыст аўстралійскага рок-гурта АC/DC Малькальм Янг часова пакідае калектыў з-за праблем са здароўем.

Пра гэта гаворыцца на афіцыйным сайце гурта, перадае ІТАР-ТАСС.

"Пасля 40 гадоў, праведзеных у AC/DC, гітарыст і заснавальнік Малькальм Янг часова сыходзіць з калектыву з-за дрэннага стану здароўя. Сам гурт працягне займацца музыкай", - адзначаецца ў паведамленні. У ім не ўдакладняецца, якія менавіта праблемы са здароўем у 61-гадовага Янга.

Малькальм Янг заснаваў AC/DC у 1973 годзе ў Сіднэі разам з братам Ангусам. AC/DC з'яўляецца самай вядомым рок-гуртом з Аўстраліі і адным з найпапулярнейшых у свеце. За 40 гадоў існавання калектыву прададзена звыш 200 млн копій альбомаў па ўсім свеце. Апошні студыйны альбом "Black Ice" гурт выпусціў у 2008 годзе.

AC/DC лічыцца піянерам хард-рока, хоць самі музыкі называюць сябе рок-н-рольшчыкамі, паколькі ў аснове іх кампазіцый ляжыць рытм-энд-блюз з моцна скажоным гучаннем рытмічнай і сола-гітар, што лічыцца візітнай карткай калектыву.

У 2003 годзе AC/DС была ўключаная ў Залу славы рок-н-рола. У 2009 годзе Малькальм і Ангус Янгі трапілі ў спіс найвялікшых гітарыстаў усіх часоў па версіі часопіса Classic Rock. У 2010 годзе гурт атрымаў прэмію Grammy за кампазіцыю "War Machine".

Фота: Jorge Herrera/WireImage