Вынікі перамоў у Жэневе: вызваленне будынкаў, амністыя і раззбраенне баевікоў

Поўны тэкст рэзалюцыі, падпісанай удзельнікамі перамоў.

На Жэнеўскай сустрэчы паводле сітуацыі ва Украіне стораны дамовіліся аб першапачатковых канкрэтных кроках у дээскалацыі напружанасці і аднаўленні бяспекі для ўсіх грамадзян. Пра гэта гаворыцца ў тэксце рэзалюцыі паводле вынікаў сённяшняга пасяджэння кіраўнікоў дыпламатычнага ведамства ЗША, ЕЗ, Украіны і Расеі, апублікаваным на сайце МЗС Украіны.

У тэксце рэзалюцыі паводле вынікаў сустрэчы ў Жэневе таксама адзначаецца:

«Усе стораны павінны ўстрымлівацца ад усякага гвалту, запалохвання або правакацыйных дзеянняў. Удзельнікі рашуча асудзілі і адкінулі ўсе праявы экстрэмізму, расізму і рэлігійнай нецярпімасці, у тым ліку антысемітызму.

Усе незаконныя ўзброеныя фарміраванні павінны быць раззброеныя; усе незаконна занятыя будынкі павінны быць вернутыя законным уладальнікам; усе незаконна занятыя вуліцы, плошчы і іншыя грамадскія месцы ва ўкраінскіх гарадах і пасёлках павінны быць вызваленыя.

Амністыя будзе прадстаўленая пратэстоўцам і тым, хто пакінуў будынкі, іншыя грамадскія месцы і здаў зброю, за выключэннем асоб, прызнаных вінаватымі ў злачынствах.

Было пастаноўлена, што Спецыяльная місія назіральнікаў АБСЕ павінна адыгрываць вядучую ролю ў аказанні дапамогі ўкраінскім уладам і мясцовым суполкам у непасрэднай рэалізацыі гэтых мер у дээскалацыі там, дзе яны больш за ўсё патрэбныя. ЗША, ЕЗ, і Расея абавязваюцца падтрымаць гэтую місію, у тым ліку шляхам увядзення назіральнікаў.

Абвешчана пра пачатак канстытуцыйнага працэсу, празрыстага і падсправаздачнага. Ён будзе ўключаць неадкладнае стварэнне шырокага нацыянальнага дыялогу, з ахопам усіх рэгіёнаў Украіны і палітычных выбарчых акругаў, стварэнне ўмоў для разгляду заўваг грамадскасці і прапанаваных паправак.

Удзельнікі падкрэслілі важнасць эканамічнай і фінансавай стабільнасці ва Украіне і будуць гатовыя абмеркаваць дадатковую падтрымку, калі вышэйзгаданыя крокі рэалізуюцца».

Нагадаем, кансультацыі ў фармаце кіраўнікоў знешнепалітычных ведамстваў пачаліся сёння а 12:00 паводле кіеўскага часу. Першапачаткова планавалася, што абмеркаванне крызісу ва Украіне будзе доўжыцца блізу дзвюх гадзін, пасля чаго пяройдзе ў рэжым працоўнага ланча. Аднак перамовы зацягнуліся больш, чым на сем гадзін.