У Луганску за расейскіх баевікоў таксама даюць па $10 тысяч
7- 18.04.2014, 10:39
- 14,153
У Луганскай вобласці лідар ВАА «Народны рух» Сяргей Шахаў паабяцаў узнагароду за вяртанне зброі і кожнага перададзенага «зялёнага чалавечка».
«Сітуацыя складаная. Мне з усіх бакоў паведамляюць, што зброя з захопленага ў Луганску СБУ пайшла гуляць па вобласці, - растлумачыў палітык сваё рашэнне ў каментары «Главкому». - У Стаханаве быў затрыманы чалавек, у яго знайшлі пісталет ПМ, 31 патрон».
У якасці ўзнагароджання за кожны вернуты аўтамат прапануецца 500 даляраў, кулямёт - 700 даляраў, гранатамёт - 1000 даляраў, а за кожнага перададзенага «зялёнага чалавечка» - 10 тысяч даляраў.
«Пад «зялёнымі чалавечкамі» маюцца на ўвазе, натуральна, прадстаўнікі расейскіх спецслужбаў, якія працуюць на тэрыторыі Луганскай вобласці», - адзначае Шахаў.
Шахаў таксама абяцае, што ўся інфармацыя пра людзей, якія вырашылі здаць зброю, будзе засакрэчаная, а праваахоўныя органы не стануць нікога з іх затрымліваць.
«Я падтрымліваю гэта, каб не было крыві і ваенных дзеянняў», - каментуе ён.
Такім чынам Сяргей Шахаў далучыўся да ініцыятывы, агучанай раней бізнесменам Ігарам Каламойскім. На чале з ім улады Днепрапятроўскай вобласці прапанавалі ад тысячы даляраў за здачу зброі і па 10 тысяч даляраў за перадачу расейскіх наймітаў.
Нагадаем, будынак СБУ ў Луганску быў захоплены і да гэтага часу знаходзіцца пад кантролем сепаратыстаў.