Войскі Расеі мінуюць мяжу Крыма і Херсонскай вобласці

Расейскі бок мінуе тэрыторыю Украіны ўздоўж лініі знаходжання акупацыйных войскаў у Крыме.

Пра гэта сёння на брыфінгу паведаміў дырэктар дэпартамента інфармацыйнай палітыкі МЗС Украіны Яўген Перабійніс, перадае ЛІГАБізнесІнформ.

Каментуючы даручэнне прэм'ер-міністра РФ Дзмітрыя Медведва па ўладкаванні так званай мяжы на поўначы Аўтаномнай Рэспублікі Крым, ён сказаў: "І даручэнні, і практычныя дзеянні расейскага боку з'яўляюцца не чым іншым як спробай інжынернага ўладкавання пярэдняга краю знаходжання войскаў РФ на акупаванай тэрыторыі АРК".

МЗС расцэньвае такія намеры расейскага боку як чарговы крок на шляху замацавання анэксіі Крыма і як сведчанне грубага парушэння Расеяй нормаў міжнароднага права, у прыватнасці, адносна павагі да суверэнітэту і тэрытарыяльнай цэласнасці Украіны ў яе прызнаных межах.

"Таксама выклікае сур'ёзную занепакоенасць той факт, што ў парушэнне канвенцый аб забароне прымянення, назапашвання, вытворчасці і перадачы проціпяхотных мін і аб іх знішчэнні, расейскі бок працягвае практыку мінавання тэрыторыі Украіны проціпяхотнымі і супрацьтанкавымі мінамі ўздоўж лініі знаходжання акупацыйных войскаў", - адзначыў ён .

Перабійніс сцвярджае, што такія свае дзеянні расейскі бок спрабуе схаваць ад міжнароднай супольнасці.

Раней прэм'ер-міністр РФ даручыў новаму кіраўніку Расмяжы неадкладна прыступіць да ўладкавання дзяржаўнай мяжы паміж РФ і Украінай з улікам далучэння Крыма і Севастопаля да Расеі.

Нагадаем, з пачатку сакавіка ў раёне Перакопскага пярэсмыка, які злучае Крым з мацерыковай Украінай, з'явіліся блокпосты так званай "самаабароны" і казакоў, якія аглядаюць увесь транспарт.