Кэтрын Эштан: ЕЗ адзіны ў абароне незалежнасці Украіны
2- 5.04.2014, 16:50
- 5,823
Еўразвяз, як і раней, адзіны ў сваёй рэакцыі на пагрозу ўкраінскаму суверэнітэту.
Пра гэта пасля нефармальнай сустрэчы міністраў замежных спраў ЕЗ заявіла вярхоўная прадстаўніца ЕЗ у пытаннях знешняй палітыкі і палітыкі бяспекі, віцэ-прэзідэнт Еўракамісіі Кэтрын Эштан, паведамляе «Інтэрфакс-Україна».
«Я магу нагадаць усім, што мы застаёмся адзінымі ў нашай адданасці дзейнічаць разам, каб рэагаваць на пагрозу ўкраінскага суверэнітэту і стабільнасці», - заявіла Эштан.
З яе слоў, украінскае пытанне зноў было адным з галоўных на парадку дня.
Таксама Эштан падкрэсліла важнасць працягу палітычнага дыялогу.
«Мы будзем працягваць наш дыялог з Расеяй, з украінскімі калегамі і ЗША», - заявіла Эштан і адзначыла неабходнасць дээскалацыі сітуацыі з боку Расеі.
Таксама вярхоўная прадстаўніца ЕЗ адзначыла, што планаванае да падпісання пагадненне аб глыбокай і ўсёабдымнай зоне свабоднага гандлю з Украінай у рамках пагаднення аб асацыяцыі «будзе мець толькі станоўчы эфект на расейскую эканоміку».