Дырэктар «Аблічча»: Мяне прасілі агаварыць трох высокапастаўленых чыноўнікаў

Следчы абяцаў вызваліць Мікалая Клімука ў абмен на паказанні супраць чыноўнікаў.

У Берасцейскім абласным судзе завяршыліся слуханні паводле справы ў дачыненні да былога гендырэктара скандальнага ТАА «Аблічча». У сваім заключным слове абвінавачаны Мікалай Клімук сказаў, што не шкадуе аб сваім лёсе. Шкадуе толькі пра нявыкананыя дамовы з дольшчыкамі і банкруцтва кампаніі, якая стала, з ягоных слоў, ахвярай фінансава-эканамічнага крызісу, а таксама ўласных памылак, але не злачынстваў, піша «Вячэрні Брэст».

Вельмі рэзананснай стала фраза, вымаўленая Клімуком на фінішы судовага працэсу.

«Мог бы я пазбегнуць знаходжання за кратамі? Шчыра скажу, ды, мог бы. 15 траўня 2012 года кіраўнік следчай групы паказаў мне двое дзвярэй - адны - у следчы ізалятар, другія - на волю. Прапанаваў даць паказанні на трох высокапастаўленых чыноўнікаў. Я адмовіўся, бо не меў на тое падстаў. Затым, ужо ў СІЗА, на мяне працягвалі аказваць ціск. Казалі, што дадуць 8-10 гадоў, калі я не змяню свайго рашэння. Толькі калі я абурыўся ў рэзкай форме, спынілі гэта рабіць. Таму я спадзяюся на справядлівы вырак суда, але любы яго вердыкт прыму спакойна», - заявіў 60-гадовы экс-кіраўнік ТАА «Аблічча».

Заключнаму слову Клімука папярэднічалі трохгадзінныя спрэчкі бакоў, падчас якіх дзяржабвінаваўца Генадзь Буры і адвакат Зінаіда Белая адстойвалі кожны сваю пазіцыю ў гэтай нашумелай справе. Рэпартаж пра спрэчкі чытайце ў наступным нумары «Вячоркі» (выйдзе вечарам 8 красавіка).

Прысуд Клімуку суд абяцае абвясціць не раней 12 траўня.