15 гадоў таму памёр Генадзь Карпенка

6 красавіка спаўняецца 15 гадоў з дня раптоўнай смерці Генадзя Карпенкі.

Ён быў адным з найбольш выбітных, аўтарытэтных і паважаных беларускіх палітыкаў і ўяўляў рэальную пагрозу для дыктатара.

Генадзь Карпенка нарадзіўся 17 верасня 1949 года ў Менску. Скончыў Беларускі політэхнічны інстытут. Працаваў у Інстытуце ядзернай энергетыкі Акадэміі навук Беларусі. З 1983 года працаваў у НВА парашковай металургіі.

У 1987-1990 гадах быў дырэктарам завода парашковай металургіі ў горадзе Маладзечна.

У 1990 годзе абраны дэпутатам Вярхоўнага Савета 12-га склікання, а затым - старшынёй камісіі ў навуцы і навукова-тэхнічным прагрэсе. З 1991 па 1994 год узначальваў Маладзечанскі гарвыканкам. У 1995 годзе яго зноў абралі дэпутатам Вярхоўнага Савета. Ён стаў намеснікам старшыні апошняга законнага беларускага парламента.

У 1996 годзе Генадзь Карпенка быў адным з ініцыятараў працэдуры імпічменту Лукашэнкі, якую пачалі дэпутаты Вярхоўнага Савета. Праз два гады ён узначаліў Нацыянальны выканаўчы камітэт, створаны беларускай апазіцыяй. Генадзь Карпенка мог скласці рэальную канкурэнцыю дзейнай уладзе стаць прэзідэнтам Беларусі ў 2001 годзе.

Доктар тэхнічных навук, член-карэспандэнт Нацыянальнай Акадэміі навук, заслужаны дзеяч навукі БССР, лаўрэат Дзяржаўнай прэміі ў галіне навукі і тэхнікі. Аўтар 40 вынаходак.

Генадзь Карпенка памёр ад кровазліцця ў мозг раніцай 6 красавіка 1999 года ва ўзросце 49 гадоў. Гэта адбылося за месяц да альтэрнатыўных прэзідэнцкіх выбараў, прыхільнікі правядзення якіх адмовіліся прызнаць навязаныя Лукашэнкам змены ў Канстытуцыі, якія азначалі працягненне тэрміна яго паўнамоцтваў на прэзідэнцкай пасадзе.

Праз месяц пасля загадкавай смерці палітыка бясследна знік адзін з яго бліжэйшых паплечнікаў - Юры Захаранка, яшчэ праз паўгода другі - Віктар Ганчар, які разам з бізнесоўцам Анатолем Красоўскім быў выкрадзены ў цэнтры Менска.

Сапраўдныя прычыны смерці Генадзя Карпенкі да гэтага часу невядомыя. Ён ніколі не скардзіўся на сваё здароўе. Сваякі і прадстаўнікі апазіцыі сумняваюцца ў натуральных прычынах смерці і полагают, мяркуюць, што да яе датычныя беларускія ўлады.

Жонка і дзеці апазіцыйнага палітыка праз пастаянны пераслед і прэсінгу з боку рэжыму вымушаныя былі з'ехаць у Нямеччыну, дзе атрымалі статус палітычных уцекачоў.

У 2009 годзе вядомыя палітыкі, прадстаўнікі творчай інтэлігенцыі і грамадскія дзеячы звярнуліся ў сталічны гарвыканкам з заклікам назваць імем Генадзя Карпенкі адну з менскіх вуліц, аднак улады адмовіліся зрабіць гэта.

Фота: BYMEDIA.NET