Рупар крамлёўскай прапаганды ў ЗША трапіў у скандал праз махлярства

Уладальніку тэлекампаніі, якая супрацоўнічае з Russia Today, пагражае да трох гадоў пазбаўлення волі за махлярства з падаткамі.

Пра гэта, у прыватнасці, паведамляе Fox News са спасылкай на онлайн-выданне Washington Free Beacon.

Скандал разгарэўся пасля таго, як у карпаратыўнай падатковай дэкларацыі кампаніі RTTV America, назва якой сугучна з назвай расейскага тэлеканала RT (Russia Today), які вяшчае ў ЗША, былі выяўленыя фіктыўныя выдаткі на агульную суму больш аднаго мільёна даляраў, піша runyweb.com.

Ураджэнец Расеі Аляксей Язлоўскі (Alexei Iazlovsky), які пастаянна жыве ў Мэрылэндзе, і ў карпаратыўных дакументах RTTV America лічыцца прэзідэнтам, а ў судовых - уладальнікам кампаніі, ужо прызнаўся ў тым, што ў ліпені мінулага года сапраўды падаў ілжывыя звесткі ў падатковай дэкларацыі, што з'яўляецца крымінальным злачынствам.

Згодна з прызнаннем Язлоўскага, акрамя гэтага, ён перавёў у агульнай складанасці больш за адзін мільён даляраў з рахунку кампаніі RTTV America, Inc. на рахунак падстаўной кампаніі Sedy Systems, LLC, якой валодае яго асабісты бухгалтар Надаў Калай (Nadav Kalaі), вывеў $2.6 мільёна на незадэклараваны рахунак банка ў Люксембургу, а таксама падаваў ілжывыя звесткі як у асабістай, так і ў карпаратыўнай падатковых дэкларацыях у перыяд з 2002 па 2010 год.

Паводле судовых дакументаў, першыя $245 000 былі пералічаныя на рахунак Sedy Systems, LLC 29 снежня 2008 года. Язлоўскі прызнаў, што гэтая кампанія ніколі не аказвала ніякіх паслуг RTTV America і пералік быў зроблены з мэтай пазбегнуць падаткаў.

Грошы амаль адразу ж былі адпраўленыя нейкаму «расейскаму кліенту», які, у сваю чаргу перавёў іх кампаніі RTTV Studios, LLC, якая таксама належала Язлоўскаму. Прычым, грошы трапілі на рахунак новай кампаніі ўжо ў наступным падатковым годзе, што дазваляла часова пазбегнуць выплаты падаткаў.

15 снежня 2009 па той жа схеме былі «ачышчаны» яшчэ $900 000, якія RTTV America пры гэтым «спісала» з падаткаў, як выдаткі.

RTTV America, Inc. - гэта прыватная кампанія, зарэгістраваная ў 2005 годзе ў акрузе Калумбія, якая працуе ў сферы вытворчасці тэлевізійнага кантэнту. Гадавы прыбытак кампаніі, у якой паводле афіцыйных звестак працуе амаль 45 чалавек, ацэньваецца, у сярэднім, у 2 млн 400 тысяч даляраў.

Камерцыйны дырэктар Russia Today (RT) Раман Токман (Roman Tokman) катэгарычна адмаўляе прамую сувязь тэлеканала, што фінансуецца расейскім урадам, з кампаніяй RTTV America. Ён пры гэтым паведаміў, што відэапрадукцыя, якую вырабляе RTTV America, прадаецца ў Расею і транслюецца, у ліку іншых, на тэлеканале RT.

У той жа час, згодна з журналісцкім расследаваннем, праведзеным сайтам Washington Free Beacon, у падатковых дэкларацыях RTTV America, Inc. паказаны той жа адрас, што і RT America. Акрамя таго, згодна з падатковымі формамі W2, пададзенымі супрацоўнікамі рэдакцыі RT America, яны афіцыйна лічацца ў кампаніі RTTV America.

Атрымаць якія-небудзь каментары ад самага Язлоўскага або ад яго адваката журналістам пакуль не ўдалося. Слуханні паводле ягонай справы прызначаныя на чэрвень гэтага года. Яны будуць праходзіць у каліфарнійскім Акруговым судзе ЗША.