Губернатар Данбаса: На ўсходзе Украіны ажыццяўляецца пераварот
7- 7.04.2014, 18:52
- 19,993
На ўсходзе Украіны рэалізуецца мэтанакіраваны сцэнар дзяржаўнага перавароту, накіраванага на раскол краіны.
Пра гэта ідзе гаворка ў заяве кіраўніка Данецкай абласной дзяржаўнай адміністрацыі Сяргея Таруты, паведамляюць «Навіны Данбаса».
Тарута асудзіў сепаратыстаў, якія занялі Данецкую аблдзяржадміністрацыю.
«Пастановы, якія прымаюцца зараз людзьмі, што захапілі дзяржаўныя ўстановы, з'яўляюцца незаконнымі», - заявіў ён.
«Законны выхад з існуючага крызісу павінна знайсці дзеючая абласная рада дэпутатаў. Заклікаю вызваліць залу для правядзення пазачарговай сесіі. Каб пазбегнуць сілавога сцэнару развіцця падзей, неабходна даць дэпутатам магчымасць сабрацца ў экстраным парадку. Далейшы дыялог неабходна выбудоўваць выключна ў прававым полі», - заклікаў данецкі губернатар.
Нагадаем, учора сепаратысты захапілі будынак Данецкай аблдзяржадміністрацыі. Не дачакаўшыся ад дэпутатаў аблрады выканання сваіх патрабаванняў, сёння яны абвясцілі стварэнне «Данецкай народнай рэспублікі».