Літоўскі сябар Лукашэнкі затрыманы ў Маскве

Паліцыя затрымала экс-кіраўніка Ūkio bankas Уладзіміра Раманава ў Маскве.

Праваахоўныя органы Літвы чакаюць афіцыйнай інфармацыі пра тое, што ў Маскве затрыманы найбуйнейшы акцыянер банка Ukio bankas Уладзімір Раманаў, якога Літва шукае ў сувязі з падазрэннямі ў прысваенні і крадзяжах маёмасці.

"У цяперашні час у нас няма афіцыйнай інфармацыі, што (Раманаў) быў затрыманы. Як раз цяпер чакаем інфармацыі ад расейскай правааховы", - сказаў BNS галоўны пракурор Генпракуратуры Літвы Сімонас Слапшынскас.

Генеральны пракурор Дарсю Валіс сказаў, што пакуль не будзе каментаваць інфармацыю аб затрыманні Раманава. Кіраўнік Аддзела камунікацый Генпракуратуры Эляна Марцінанене сказала, што пракуратура не атрымлівала "афіцыйна пацверджаных дадзеных аб затрыманні Раманава".

Міністр унутраных спраў Алфонсас Дайліс Баракаўскас сказаў, што таксама не мае афіцыйнай інфармацыі аб затрыманні былога ўладальніка Ukio bankas, і накіраваў у Генпракуратуру, піша ru.delfi.lt.

Як паведамляе расейскае інфармацыйнае агенцтва "Інтэрфакс" са спасылкай на сваю крыніцу, у Маскве супрацоўнікамі крымінальнага вышуку Расеі затрыманы былы ўладальнік Ūkio bankas Уладзімір Раманаў.

У прэс-службе Галоўнага ўпраўлення МУС Масквы агенцтву паведамілі, што ў панядзелак на вуліцы Кірпічнай быў затрыманы грамадзянін Літвы 1947 года нараджэння, аб'яўлены ў вышук НЦБ Інтэрпола Літвы за прысваенне і растрату ў асабліва буйным памеры. Яго імя ведамства не назвала.

Па дадзеных крыніцы "Інтэрфакса" ў расейскіх праваахоўных органах, гаворка ідзе пра 66-гадовага Уладзіміра Раманава, былога ўладальніка банка Ūkio bankas.

"Прыбалтыйскія калегі ўжо папярэджаныя аб затрыманні грамадзяніна, які імі адшукваецца", - сказаў супрацоўнік прэс-службы. У бліжэйшы час будзе вырашацца пытанне аб перадачы затрыманага ініцыятару вышуку, паведамляе NEWSru.com.

Нагадаем, што ў пачатку траўня 2013 года Раманаў з'ехаў у Расею, а 4 ліпеня ён быў абвешчаны ў міжнародны вышук. Былы ўладальнік банка Ukio bankas стаў падазраваным у крымінальнай справе.

Генпракуратура Літвы ў лютым мінулага года пачала дасудовае расследаванне з нагоды магчымага крадзяжу маёмасці ва Ukio bankas у буйным памеры. Дзейнасць банка таксама была абмежаваная ў лютым.

Дасудовае расследаванне распачата з улікам прадстаўленай Нацбанкам Літвы інфармацыі аб устаноўленых падчас інспектавання падазроных здзелках, заключаных у 2005-2012 гадах.

Пракурор Мінкявічус у лютым мінулага года казаў, што кіраўнікоў банка Ukio bankas падазраюць у тым, што яно здавала ў арэнду маёмасць па неабгрунтавана высокіх коштах і за высокія зарплаты працаўладкоўвала звязаных з ім асоб.

Па словах Мінкявічуса, у гэтым расследаванні ёсць і іншыя падазраваныя. Ён сцвярджае, што пытанне аб адказнасці іншых падазраваных будзе вырашацца незалежна ад таго, ці будзе знойдзены і затрыманы Раманаў.

Дзейнасць Ukio bankas была спыненая 12 лютага мінулага года. 18 лютага ён быў прызнаны неплацежаздольным, і яго ліцэнзія была ануляваная. Потым "здаровая" частка маёмасці банка была перададзеная банку Siauliu bankas, у дачыненні да "дрэннай" часткі маёмасці неўзабаве павінна быць абвешчана банкруцтва. Раманаву належала 65% акцый Ukio bankas.

Расейскае выданне NEWSru.com таксама нагадвае, што літоўскія праваахоўныя органы актыўна ўдзельнічаюць у расследаванні дзейнасці расейскіх чыноўнікаў, якіх на Захадзе падазраюць у дачыненні да гібелі арыштаванага юрыста Сяргея Магніцкага.

Па запыце былога працадаўцы аўдытара - Hermitage Capital - былі замарожаныя банкаўскія рахункі шэрагу грамадзян РФ. Грошы, якія знаходзяцца на іх, магчыма, ужо не вернуцца ў Расею. У банках Літвы Hermitage Capital выявіў сляды прысутнасці часткі ад 230 млн даляраў, у крадзяжы якіх Магніцкі западозрыў расейскіх чыноўнікаў.

Пракурор Каўнаскай акруговай пракуратуры Данатас Пузінас заявіў тады, што рахункі ўсіх афшорных кампаній, якія рабілі транзакцыі праз Ukio bankas, замарожаныя. Гаворка ідзе пра невялікую суму ў 100 тысяч даляраў. Усе рахункі былі адкрытыя і кіраваліся з Расеі і Украіны - ва Ukio bankas там былі філіялы.

Уладзімір Раманаў - адзін з найбуйнейшых літоўскіх алігархаў. СМІ неаднаразова пісалі пра яго сувязі з беларускім дыктатарам< /a> і інтарэсы ў нашай краіне. У прыватнасці, Уладзімір Раманаў у свой час атрымаў некалькі пляцовак пад забудову ў Менску. Сярод яго беларускіх актываў было і будаўніцтва новага стадыёна на месцы «Трактара», а таксама - забудова прылеглай тэрыторыі. Гэта каля 280 тыс. кв. м, у якія неабходна было ўкласці каля 700 млн даляраў. Таксама літоўцы збіраліся інвеставаць у жыллё на менскіх ускраінах - у комплексы «Каменная Горка» (150 тыс. кв. м жылля) і «Лошыца» (220 тыс. кв. м).