Мэр Данецка: Сепаратысты патрабавалі аддаць тралейбус на барыкады
4- 8.04.2014, 11:31
- 7,738
Акрамя таго, расейскія баевікі перакрылі газазабеспячэнне ў адным з раёнаў горада.
Сёння на прэс-канферэнцыі ў Данецкам гарсавеце мэр Данецка Аляксандр Лук'янчанка заявіў, што ў апошні час радыкалы спрабуюць дэстабілізаваць сітуацыю ў Данецку, піша segodnya.ua.
"Так учора апоўначы невядомыя перакрылі газазабеспячэнне 14 шматпавярховых дамоў у Калінінскім раёне. Без газу засталіся 482 кватэры. Да 19:00 газазабеспячэнне ўдалося аднавіць. Засаўка знаходзіцца на вышыні 5,5 метраў і без падручных сродкаў зачыніць яе немагчыма. Міліцыя кваліфікуе гэты інцыдэнт як хуліганства", - адзначыў мэр.
Акрамя таго, па словах мэра, кожную ноч на вуліцах горада гараць аўто. На стаянках у дварах, пад адкрытым небам стаяць 150 тысяч аўтамабіляў.
"Таксама ўчора ў 15:00 у Трамвайна-тралейбуснае ўпраўленне па вуліцы Шчорса прыйшлі 20 чалавек у масках і запатрабавалі, каб ім далі тралейбус для барыкад. Пытанне ўдалося вырашыць - кіраўніцтва ТТУ сказала людзям, што за рулём тралейбусаў звычайна жанчыны, і гэта пераканала адмовіцца ад ідэі", - распавёў Лук'янчанка.
Нагадаем, 6 красавіка сепаратысты захапілі Данецкую абладміністрацыю. Мітынгоўцы зачыталі рэзалюцыю, у якой запатрабавалі неадкладнага склікання пазачарговай сесіі Данецкага аблсавета і прыняцця ёю рашэння аб правядзенні рэферэндуму аб уваходжанні ў склад Расеі, і абвясцілі аб стварэнні "Данецкай народнай рэспублікі".