«Данецкая рэспубліка» не пратрымалася і дня
13- 8.04.2014, 12:12
- 19,477
Сепаратысты Данбаса адмянілі сваё рашэнне аб абвяшчэнні незалежнасці «Данецкай рэспублікі».
Пра гэта гаворыцца ў заяве прэс-службы Камітэта патрыятычных сіл Данбаса.
"У сувязі з падзеямі апошніх дзён у КПСД паступалі шматлікія звароты грамадзян з заявамі аб іх нязгодзе са стварэннем Данецкай рэспублікі і абвяшчэннем аб яе далучэнні да суседняй дзяржавы, а таксама з правядзеннем рэферэндуму без адпаведнай нарматыўнай базы", - гаворыцца ў заяве.
У сувязі з гэтым Камітэт ужо 7 красавіка ў Данецку правёў Народныя зборы на якіх было прынятае рашэнне:
"1. Адмяніць рашэнне аб стварэнні Данецкай рэспублікі. 2. Забараніць правядзенне любых рэферэндумаў на тэрыторыі Данецкай вобласці да стварэння адпаведнай прававой базы. 3.Прызнаць незаконнымі заявы аб аддзяленні Данецкай вобласці ад Украіны і захаваць рэгіён у складзе незалежнай Украінскай дзяржавы", - паведамілі ў КПСД.
Нагадаем, пачынаючы з нядзелі, у трох усходніх рэгіёнах Украіны - Данецкай, Луганскай і Харкаўскай абласцях - працягваюцца правакацыі, арганізатарамі якіх выступілі «турысты», якія прыехалі з Расеі, мясцовыя крымінальныя элементы і прыхільнікі Віктара Януковіча, які ўцёк з краіны. У панядзелак сепаратысты ў Данецку абвясцілі стварэнне так званай "Данецкай рэспублікі".