Аршанскі чыноўнік падазраецца ў «падрыве аўтарытэту ўлады»

На намесніка старшыні Аршанскага райвыканкама завялі крымінальную справу.

Чыноўнік падазраецца ў прычыненні істотнай шкоды дзяржаўным інтарэсам, падрыве аўтарытэту органаў улады і незаконным удзеле ў прадпрымальніцкай дзейнасці, перадае БелТА.

Пра гэта паведаміла старэйшы оперупаўнаважаны па асабліва важных справах ГУБЭЗ МУС Вераніка Пасмецьева.

У ходзе сумеснай праверкі і аператыўна-вышуковых мерапрыемстваў супрацоўнікі УБЭП і УКДБ па Віцебскай вобласці ўстанавілі, што намеснік старшыні, займаючы адказную пасаду, з карыслівай і іншай асабістай зацікаўленасці больш за два гады аказваў заступніцтва ў сферы арганізацыі і вядзення будаўнічых работ ПВУП «ТопЕўраБуд» (зарэгістравана ў менскім раёне), адзіным заснавальнікам якога з'яўляўся яго сын.

Чыноўнік з выкарыстаннем сваіх службовых паўнамоцтваў у парушэнне патрабаванняў заканадаўства «Аб барацьбе з карупцыяй» і «Аб дзяржаўнай службе» браў удзел у кіраванні фінансава-гаспадарчай дзейнасцю названага прадпрыемства. Так, з жніўня 2010 па ліпень 2013 года ён наўмысна і з карыслівай зацікаўленасці сістэматычна даваў незаконныя ўказанні, якія відавочна выходзяць за межы яго правоў і паўнамоцтваў, кіраўнікам шэрагу дзяржаўных арганізацый Оршы і Аршанскага раёна аб прадастаўленні яму ў асабістых мэтах транспартных сродкаў, спецыяльнай тэхнікі, абсталявання і работнікаў.

Прадпрыемства «ТопЕўраБуд» выступала субпадрадчыкам па будаўніцтве шматлікіх аб'ектаў у Оршы і яго раёне. З ім складаліся дамовы на выкананне розных будаўніча-мантажных работ, нягледзячы на адсутнасць на балансе прадпрыемства спецтэхнікі, будаўнічага абсталявання, транспартных сродкаў і неабходнай працоўнай сілы. На самой справе названыя работы па вусным указанні дзяржаўнага служачага выконваліся дзяржарганізацыямі Оршы і Аршанскага раёна, а аплата адпаведна выраблялася як мяркуецца, на карысць будаўнічага прадпрыемства.

Такім чынам, чыноўнік прычыніў істотную шкоду дзяржаўным інтарэсам у выглядзе падрыву аўтарытэту органаў дзяржаўнай улады, а таксама ў інтарэсах ПВУП «ТопЕўраБуд» прымаў незаконны ўдзел у прадпрымальніцкай дзейнасці.

Следчым упраўленнем УСК па Віцебскай вобласці па матэрыялах сумеснай праверкі службы БЭЗ і КДБ у дачыненні да намесніка старшыні Аршанскага раённага выканаўчага камітэта 1 красавіка распачатая крымінальная справа за перавышэнне ўлады (ч. 3 арт. 426 КК) і незаконны ўдзел у прадпрымальніцкай дзейнасці (арт. 429 КК).

Падазраваны за ўчыненне названых злачынстваў быў затрыманы праваахоўнымі органамі і утрымліваўся ў ІЧУ. У цяперашні час да яго ўжытая мера працэсуальнага прымусу - абавязацельства аб яўцы. Вырашаецца пытанне аб адхіленні яго ад займанай пасады, праводзіцца далейшае расследаванне.

Паводле крымінальнага заканадаўства, за перавышэнне ўлады або службовых паўнамоцтваў, учыненыя асобай, якая займае адказную пасаду, прадугледжанае пакаранне ў выглядзе пазбаўлення волі ад трох да дзесяці гадоў з канфіскацыяй маёмасці і пазбаўленнем права займаць пэўныя пасады, а за незаконны ўдзел у прадпрымальніцкай дзейнасці службовай асобы, якая знаходзіцца на дзяржаўнай службе, - у выглядзе пазбаўлення волі на тэрмін да пяці гадоў са штрафам або без штрафу i з пазбаўленнем права займаць пэўныя пасады або займацца пэўнай дзейнасцю.