Гары Каспараў: Пуцін баіцца Майдана на Краснай плошчы

Менавіта з-за гэтага ён гатовы рызыкаваць і пачынаць вайну.

"Крызіс ва Украіне не сціхае: з'явіўся новы ачаг напружанасці: Данецк, - піша піша журналіст Стэфана Маньі ў артыкуле, апублікаваным у італьянскай газеце L'Opinione (пераклад — Инопресса). - Гэтак жа, як і месяц таму ў Крыме, у Данецку прарасейскі рух захапіў будынак мясцовага ўрада, абвясціў аддзяленне ад Кіева і звярнуўся з просьбай аб далучэнні да Расеі. Калі мэта Крамля - заваёўваць Украіну вобласць за вобласцю, яму гэта ўдаецца. У раўнінным рэгіёне з рускамоўным насельніцтвам расейская армія можа лёгка прасоўвацца наперад, не сустракаючы супраціву непадрыхтаванай украінскай арміі, у спрыяльнай сацыяльнай прасторы".

У чаканні новых крокаў Крамля шахматыст Гары Каспараў, палітычны праціўнік Уладзіміра Пуціна, перакананы, што заходнія стратэгі рэгулярна здзяйсняюць дзве памылкі. Першая: яны ўспрымаюць расейскага прэзідэнта як разумнага лідара, палітыка якога накіраваная на адстойванне расейскіх нацыянальных інтарэсаў.

"Але гэта не так, - паказвае апазіцыянер. - У Пуціна адзін галоўны інтарэс - заставацца ва ўладзе. Непрапарцыйна рэзкая рэакцыя на падзеі на Майдане тлумачыцца страхам , што другі Майдан можа адбыцца на Краснай плошчы ў Маскве. Менавіта таму ён гатовы рызыкаваць развязваннем вайны нават каля парога свайго дома. Другая памылка Захаду заключаецца ва ўпэўненасці амерыканскай і еўрапейскай кіруючай эліты, што яна не можа распачаць нічога канкрэтнага, каб спыніць расейскі наступ. Заспакаяльныя заявы Джона Кэры і Барака Абамы толькі ўзмацняюць уражанне Пуціна пра тое, што перад ім слабы праціўнік. І таму ён працягвае сваю палітыку па далучэнні Украіны, сустракаючы на шляху ўсё менш перашкод".

У рэчаіснасці, на думку Каспарава, хапіла б абмежаваных намаганняў, без рызыкі ўзнікнення вайны. Усё, што цікавіць Пуціна, гэта захаванне ўлады, такім чынам, трэба ўнесці раскол у яго ўладную групу, кажа Каспараў, маючы на ўвазе санкцыі. Наносячы ўдары па набліжаных Пуціна, цалкам заморжваючы іх велізарныя багацці і амбіцыйныя інвестыцыі ў заходнім свеце, можна рэальна паставіць іх перад выбарам: кашалёк або адданасць лідару. І многія зробяць выбар на карысць кашалька.

"Заходнім лідарам, - кажа Каспараў, - варта ўвесці санкцыі ў дачыненні да эліты, якая падтрымлівае Пуціна. Гаворка не ідзе пра вядзенне войнаў ці разбурэнне экспарту-імпарту з Расеяй. Гаворка ідзе ўсяго толькі пра санкцыі супраць некаторых асоб. Цяпер гэтага будзе дастаткова".