The Wall Street Journal: Пуцін дзейнічае па законах тэрарыстаў

Парушаючы дамовы, міжнароднае права і Жэнеўскую канвенцыю, Масква стварае небяспеку для ўсяго свету.

Прэзідэнт Абама называе анэксію Крыма Расеяй незаконнай і нелегітымнай, аднак спрабуе мінімізаваць стратэгічную значнасць здзейсненага Пуціным тэрытарыяльнага захопу. На справе дзеянні Масквы небяспечна дэстабілізуюць міжнародную сістэму. У выніку з'яўляецца стымул ужываць сілу і абзавесціся ядзернай зброяй, перасцерагаюць аглядальнікі The Wall Street Journal (пераклад - Инопресса).

"Тры асноватворных прынцыпа міжнароднага права, якія знайшлі адлюстраванне ў Статуце ААН і даўно існуючых традыцыях, - гэта роўнасць усіх дзяржаў, святасць іх тэрытарыяльнай цэласнасці і неўмяшанне знешніх сіл у іх унутраныя справы, - нагадваюць аўтары артыкула. - Аднак Масква сёння настойвае на тым, што у яе маюцца ўнікальныя правы і прывілеі на абарону інтарэсаў рускамоўнага насельніцтва за межамі яе тэрыторыі і спецыяльныя прэрагатывы ў дачыненні да "гістарычна рускіх" тэрыторый, якія не ўвайшлі ў склад Расеі пасля распаду Савецкага Саюза ў 1991 годзе".

Гэтыя дамаганні аформіліся ў канкрэтныя патрабаванні да кіеўскага ўраду. Масква настойвае на адмене прызначаных на травень прэзідэнцкіх выбараў, змяненні ўкраінскай канстытуцыі з мэтай забеспячэння шырокай аўтаноміі рэгіёнаў і прадастаўлення рускай мове статусу другой афіцыйнай. У Крамлі таксама хочуць бачыць Украіну нейтральнай дэмілітарызаванай дзяржавай, пішуць аўтары.

"Патрабаванні Пуціна - відавочнае парушэнне прынцыпу неўмяшання ва ўнутраныя справы іншых дзяржаў, замацаванага ў Статуце ААН і агульнапрызнаных нормах міжнароднага права", - гаворыцца ў артыкуле.

"Законы вядзення вайны ўжо падвяргаюцца нападкам з боку тэрарыстычных арганізацый, чые баевікі звычайна дзейнічаюць без формы, каб змяшацца з грамадзянскім насельніцтвам. Калі такая буйная дзяржава, як Расея, пачынае дзейнічаць падобным чынам, гэта разбурае павагу да важнейшых нормаў і падштурхоўвае да падобных некантраляваных дзеянняў іншых ўрадаў і паўстанцкіх рухаў", - адзначаюць аглядальнікі. Расея таксама прадэманстравала, што ваенная сіла ў цэлым і ядзерная зброя ў прыватнасці - бадай, адзіны надзейны сродак абароны ад больш буйных і магутных краін.

На выпадак, калі ЗША і іх саюзнікі вырашаць адмовіцца ад мінімалістычнага неэфектыўнага падыходу, аўтары раяць ім дамагчыся ад Генасамблеі ААН прыняцця рэзалюцыі з заклікам да Міжнароднага суда вынесці свой вердыкт аб законнасці анэксіі Крыма.

"Пасіўны адказ на расейскую агрэсію падарве і без таго саслабленую падтрымку цвёрдай і дзейснай знешняй палітыкі ў ЗША і іншых краін Захаду і зробіць свет больш беззаконным і жорсткім", - робяць выснову аўтары артыкула.