Брэстчанін 15 гадзін сядзеў на краі вышкі на чыгуначным вакзале Гомеля

Толькі а 3 гадзіны ночы яго ўгаварылі спусціцца.

Тысячы беларусаў 15 гадзін сачылі анлайн праз паведамленні на інфармацыйных сайтах аб НЗ у Гомелі: мужчына сядзеў на самым краі вышкі ля чыгуначнага вакзалу. З поўдня аўторка ля вышкі дзяжурыла мясцовая прэса і дзесяткі супрацоўнікаў МНС, міліцыі і «хуткай», на месца здарэння выязджалі намеснікі начальнікаў абласных упраўленняў МНС і ўнутраных спраў, піша «Комсомольская правда в Беларуси».

Дакладных звестак аб тым, хто прыкаваў да сябе ўвагу, да гэтага часу няма. Практычна ніякай афіцыйнай інфармацыі журналістам пакуль не паведамілі. За некалькі дзесяткаў метраў да вышкі выставілі нарады міліцыі, якія не прапускалі журналістаў да месца здарэння. Больш за тое, міліцыя патрабавала адысці яшчэ на сотню метраў , аднак журналісты адстаялі хоць бы ўжо занятыя пазіцыі.

Дык вось, па непацверджанай афіцыйна інфармацыі, каля 11 раніцы ў аўторак міліцыянты заўважылі на 36-метровай асвятляльнай мачце чалавека. Супрацоўнікі МНС, якія прыбылі разам з псіхолагам, спрабавалі падняцца на вышку, каб пагаварыць з мужчынам, але ён стаў ля самага краю платформы мачты, пагражаючы саскочыць. Тады ратавальнікі ўсталявалі з таго боку вышкі, дзе сядзеў чалавек, «куб жыцця» і ад'ехалі ў бок.

Але чаканні не апраўдаліся: за некалькі гадзін мужчына не злез і не саскочыў, больш за тое, ён увесь гэты час прасядзеў амаль нерухома на краі платформы.

Тым часам, міліцыя агледзела рэчы мужчыны, якія ён пакінуў ля падножжа вышкі: заплечнік і сумку. Там знайшлі прыстойную суму ў валюце, вопратку і пашпарт на імя 33-гадовага жыхара Брэста. Міліцыянты знайшлі сваякоў мужчыны і выклікалі іх у Гомель. Таксама ў сумцы быў квіток у Краснадарскі край - кажуць, брэстчанін ехаў на адпачынак у Крым праз Расею.

Як пачало ўжо змяркацца, вырашылі прымаць меры. Да вышкі падагналі пад'ёмнік, у люльку селі выратавальнік і псіхолаг. Паступова люлька падымалася ўсё вышэй і вышэй, пакуль не заціхла ля самай верхавіны мачты. Але раптам рэзка стала апускацца, а міліцыянты, медыкі і ратавальнікі унізе - разыходзіцца. Мабыць, пагаварыць з мужчынам зноў не ўдалося, і ён запатрабаваў, каб усе разышліся, пагражаючы саскочыць.

Тое ж адбылося і пры яшчэ адной спробе падабрацца да мужчыны. У рэшце рэшт люльку апусцілі на зямлю, а ўнізе ўсе разышліся.

Калі сцямнела, мужчына працягваў сядзець на вышцы. Каля паўночы ў Гомель прывезлі сваякоў брэстчаніна. Іх паднялі ў люльцы да платформы вышкі, праз рупар яны звярталіся да мужчыны:

- Лёша, калі ласка, спускайся, паедзем дадому, усё будзе добра!

У выніку ўжо а трэцяй гадзіне ночы Аляксей спусціўся. Сястра, усё ж такі, угаварыла яго гэта зрабіць. Правёўшы 15 гадзін на вышцы, мужчына, хістаючыся, сам сышоў уніз па лесвіцы, яго адразу ж забрала «хуткая». Сваякі Аляксея наадрэз адмовіліся размаўляць з прэсай. Міліцыянты сцвярджаюць, што мужчына так нічога і не сказаў, спусціўшыся ўніз. Яго не затрымлівалі, таму што складу злачынства або правапарушэння ў яго дзеяннях не было, патлумачылі міліцыянты.