Вялікая Брытанія і Нідэрланды патрабуюць ад ЕЗ перагляду стасункаў з Расеяй
38- 20.07.2014, 9:41
- 29,190
Еўрапейскі Звяз павінен зрабіць больш жорсткай сваю пазіцыю.
Такое меркаванне выказалі прэм'ер-міністр Вялікай Брытаніі Дэвід Кэмеран і яго нідэрландскі калега Марк Рутэ падчас тэлефоннай размовы ў суботу, 19 ліпеня, паведамляе інфармацыйнае агенцтва Reuters.
Раней міністр замежных спраў Вялікай Брытаніі Філіп Хаманд заявіў, што яго краіна мае звесткі аб тым, што да катастрофы самалёта на ўсходзе Украіны з вялікай доляй верагоднасці маюць дачыненне прарасейскія сепаратысты, піша «Карэспандэнт».
Лондан абвінавачвае Маскву ў тым, што яна не аказвае дастатковага ўплыву на сепаратыстаў на ўсходзе Украіны, з тым каб яны забяспечылі міжнародным экспэртам доступ да месца катастрофы самалёта «Малайзійскіх авіяліній», паведамляе AFP.
У гутарках па тэлефоне, якія Кэмеран правёў не толькі з Рутэ, але і з прэм'ер-міністрам Аўстраліі Тоні Эбатам, усе тры палітыкі аднадушна выказаліся з нагоды таго, што Уладзімір Пуцін «павінен актыўна ўзаемадзейнічаць з міжнароднай супольнасцю і выкарыстоўваць свой уплыў на сепаратыстаў», заявіла афіцыйная прадстаўніца брытанскага ўрада.
Яна таксама падкрэсліла, што Вялікая Брытанія і Аўстралія маюць намер сумесна дамагацца ад Рады бяспекі ААН забеспячэння магчымасці для хуткага і бесперашкоднага доступу да месца катастрофы самалёта і расследавання прычын авіякатастрофы.
«Боінг-777» авіякампаніі Malaysia Airlines, які рабіў рэйс Амстэрдам - Куала-Лумпур, разбіўся ў чацвер вечарам у Данецкай вобласці. Усе 298 чалавек загінулі.