У Славакіі абрабавалі аўтобус з дзецьмі з Беларусі
21- 8.07.2014, 14:15
- 25,768
Рабаванне адбылося сёння ноччу ў горадзе Кошыцэ.
Пра гэта паведаміла дырэктарка турыстычнай кампаніі «Баншанс» Таццяна Зыль, з яе слоў, гэтай ноччу, з 7 на 8 ліпеня, у Славакіі ў горадзе Кошыцэ невядомыя выявілі і абрабавалі аўтобус, на якім беларускія дзеці вярталіся дадому пасля адпачынку ў Балгарыі, піша выданне «Турызм і адпачынак».
Аўтобус учора ўвечары спыніўся на запланаваны транзітны начлег у адным з гатэляў горада. Амаль усе турысты пакінулі свае рэчы на ноч у аўтобусе, паколькі раным-рана зноў павінны былі адправіцца ў дарогу. Тое, што ўзламанае багажнае аддзяленне і адбыўся крадзеж, выявілася сёння раніцай. Кіраўніца групы адразу ж выклікала паліцыю і апавясціла пра інцыдэнт турыстычную кампанію «Баншанс».
Як распавядае кіраўніца кампаніі Таццяна Зыль, у групе з 50 чалавек, пацярпелі 15-16, аднак уся група вымушаная затрымацца да поўнага афармлення дакументаў у паліцыі: «Цяпер на месцы ля транзітнага начлегу адбываецца разбіральніцтва, складаецца пратакол, праходзяць усе неабходныя адміністрацыйныя працэдуры, згодна з заканадаўствам Славацкай Рэспублікі».
Са слоў дырэктара кампаніі «Баншанс», дырэктарцы славацкага тураператара, якая забяспечвала транзітныя начлегі туды і назад, паведамлена аб здарэнні. «Яна знаходзіцца цяпер з групай, каб дапамагчы з перакладам, а таксама гатова па нашым распараджэнні забяспечыць групу дадатковым абедам, - дзеліцца Таццяна Зыль. - Нягледзячы на непрыемны інцыдэнт (крадзеж маёмасці), з самаадчуваннем дзяцей усё добра. Арыентыровачны час вяртання групы ў Беларусь - заўтра раніцай. Таксама аб тым, што здарылася апавясцілі і МЗС, якое сумесна з нашай кампаніяй будзе гатова аказаць усякую дапамогу, калі спатрэбіцца. Пакуль жа на месцы працуе паліцыя і развязаннем узніклай праблемы займаецца наша прымаючая славацкая старана».