Беларус скраў экскаватар ў Італіі і спрабаваў вывезці яго з ЕЗ

Польскія памежнікі спынілі спробу зламысніка і перадалі яго паліцыі.

28 ліпеня польскія памежнікі затрымалі беларусаў, якія спрабавалі вывезці з Польшчы скрадзены ў Італіі экскаватар і рухавік ад Mercedes-Benz ML, што прапаў у Францыі. Пра гэта паведамляе прэс-служба Падляшскага аддзялення Пагранічнай службы Польшчы (пераклад - charter97.org).

А 11:00 25-гадовы жыхар Беларусі паспрабаваў перасекчы мяжу на грузавіку. У кузаве знаходзіўся экскаватар KOMATSU 2003 выпуску, які быў у базе дадзеных, як зніклы. Прыблізны кошт тэхнікі – больш за € 11 000.

Крыху пазней быў затрыманы 34-гадовы беларус, які вёз рухавік ад Mercedes-Benz M-класа. Памежнікі высветлілі, што рухавік быў выняты з аўтамабіля, які прапаў у Францыі. Прыблізны кошт рухавіка - € 1600.

Памежнікі аформілі неабходныя дакументы і перадалі затрыманых у рукі паліцыі.

Фота: Прэс-служба Падляшскага аддзялення Пагранічнай службы Польшчы