У маскоўскіх крамах правядуць прадуктовыя рэйды
24- 13.08.2014, 11:57
- 11,548
Улады Масквы правядуць рэйды ў буйных сеткавых крамах для выяўлення незаконнага гандлю прадуктамі, якія трапілі пад забарону.
Пра гэта пішуць у сераду, 13 жніўня, «Известия» са спасылкай на кіраўніка сталічнага дэпартамента гандлю і паслуг Аляксея Немярука.
Цяпер гандлёвыя сеткі складаюць спісы, у якіх пазначаная колькасць забароненых прадуктаў і планаваныя тэрміны заканчэння іх продажу, распавёў чыноўнік. Дзякуючы гэтаму ў мэрыі будзе інфармацыя аб тым, калі ў крамах скончацца гэтыя тавары.
Тыя крамы, якія прадоўжаць прадаваць забароненыя прадукты пасля названага імі тэрміну, чакаюць праверкі, якія дэпартамент гандлю і паслуг будзе праводзіць разам з управай эканамічнай бяспекі і процідзеяння карупцыі ГУ МУС Расеі, адзначыў Немярук. Праверкі, удакладніў ён, могуць пачацца ўжо праз месяц.
6 жніўня прэзідэнт Расеі Уладзімір Пуцін падпісаў указ «Аб выкарыстанні асобных эканамічных мер у мэтах забеспячэння бяспекі РФ». На наступны дзень урад зацвердзіў забарону на пастаўкі ялавічыны, свініны, плодаагародніннай прадукцыі, мяса птушкі, рыбы, сыроў, малака і малочных прадуктаў з краін ЕЗ, ЗША, Канады, Аўстраліі, Нарвэгіі ды Японіі.