Сумар намаляваў помнік да «Дажынак»

На плошчы Леніна ў Пінску усталююць помнік хлебу.

Эскіз накідаў старшыня Берасцейскага аблвыканкама. Канстанцін Сумар правёў рабочую паездку ў Пінск, дзе наведаў аб'екты, якія рэканструююцца да абласных «Дажынак», піша мясцовае выданне «Медыя-Палессе».

У пачатку інспекцыі будаўнічых аб'ектах ён распавёў, што Пінск - першы буйны горад, які ён наведаў у маладосці, таму да сталіцы Палесся ў яго захаваліся асаблівыя пачуцці. Са слоў кіраўніка вобласці, да «Дажынак» будзе рэканструяваны стары горад у межах вуліц Кірава, Равецкай, Леніна, Бялова. Пры рэканструкцыі асаблівая ўвага надаецца камунікацыям, якія ў гэтых месцах горада пракладзены яшчэ ў мінулым стагоддзі. Вельмі важная замена цеплавых сетак на вуліцы Берасцейскай, на якую выдзелена 40 млрд рублёў. Але і пасля правядзення «Дажынак» мясцовыя ўлады абавязаныя будуць працягваць пачатыя пераўтварэнні, з боку вобласці будзе неабходная дапамога.

Інспекцыя Канстанціна Сумара пачалася з пешаходнай часткі вуліцы Першамайскай, далей - па плошчу Леніна, вуліцы Леніна і Горкага. Спыніўшыся на плошчы Леніна, кіраўнік вобласці выказаў заўвагу з нагоды таго, што плошча ні да чаго не прывязаная, выглядае пуставата, і прапанаваў уключыць яе ў пешаходную зону дзялянкі Першамайская - Плошча

Распавёў Канстанцін Андрэевіч Сумар і пра ідэю ўсталяваць на плошчы помнік хлебу. Між тым, адзначыў, што праект помніка, пададзены на разгляд мастацкай камісіяй, яго не задавальняе. Прадэманстраваўшы журналістам прапанаваны праект, папрасіў не фатаграфаваць яго, каб не шакаваць пінчукоў. Тут жа Канстанцін Сумар узяў ліст паперы і проста на месцы накідаў эскіз помніка. Паводле ягоных слоў, гэта аб'ект малой архітэктуры, які павінен быць не грувасткім, а арыгінальным, і гарманаваць з архітэктурай плошчы. Засталося выбраць месца ўстаноўкі помніка. Прапанавана два варыянты: ля будынка Калегіюму або каля будынка гарадскога Дома культуры.

Знаходзячыся на плошчы Леніна, пінскія будаўнікі пераконвалі старшыню аблвыканкама ў неабходнасці дэмантажу старадаўняй дарожнай пліткі «трылінкі» на плошчы, сцвярджаючы, што яна рассыпаецца на вачах, асабліва тая, якую спрабавалі ўзнавіць у савецкі час. Канстанцін Сумар дазволіў дэмантаж: дарогу выбрукуюць новай пліткай тыпу «стары горад», а ацалелыя элементы «трылінкі» будуць выкарыстаныя на вуліцы Леніна.

Нагадаем абласны фестываль «Дажынкі» пройдзе ў Пінску 13 верасня.