Беларускі гандаль сыходзіць у інтэрнэт

Колькасць інтэрнэт-крам у Беларусі за 7 месяцаў узрасла ў 1,5 разы.

Пра гэта паведаміла намесніца міністра гандлю Ірына Наркевіч падчас круглага стала «Інтэрнэт-гандаль у Беларусі: састарэлыя стэрэатыпы і неразвязаныя праблемы», які прайшоў сёння на сайце БелТА.

«Паводле стану на 1 студзеня гэтага года ў Беларусі было зарэгістравана 6473 інтэрнэт-крамы, да 8 жніўня іх стала ўжо 9627, - сказала Ірына Наркевіч. - Рост колькасці інтэрнэт-крам можна растлумачыць, перш за ўсё, станоўчым эфектам ад апошніх змяненняў у беларускім заканадаўстве, дзякуючы якім суб'екты гаспадарання, якія працуюць у сетцы інтэрнэт, у чарговы раз атрымалі магчымасць праявіць сябе ў якасці добрасумленных прадаўцоў. Адпаведныя нормы змяшчаюцца у тым ліку ў законе «Аб дзяржаўным рэгуляванні гандлю і грамадскага харчавання ў Рэспубліцы Беларусь», які ўвайшоў у дзеянне з 22 ліпеня гэтага года».

У 2006 годзе, паводле звестак Міністэрства гандлю, у Беларусі было зарэгістравана 380 інтэрнэт-крамаў. «Затым гэтая сфера стала актыўна рэгулявацца, у тым ліку указам Прэзідэнта №60 «Аб мерах ва ўдасканаленні выкарыстання нацыянальнага сегмента сеткі інтэрнэт» (згодна з дакументам, інтэрнэт-крамы ў абавязковым парадку павінны быць зарэгістраваныя ў гандлёвым рэестры), - патлумачыла Ірына Наркевіч. - У выніку да 2010 году інтэрнэт-крам у краіне стала ўжо 3 300, у 2011-м - 3930, 2012-м - 4978, а ў 2013 годзе працавала 5.619 аб'ектаў».

Таваразварот інтэрнэт-крам Беларусі за апошнія пяць гадоў вырас больш чым у 45 разоў і дасягнуў паводле вынікаў 2013 Br3 154,5 млрд. У сапраўдны час больш за ўсё інтэрнэт-крам (больш як 6,7 тысяч, або 69,7% ад агульнага аб'ёму) працуе ў Менску. У Менскай вобласці зарэгістравана больш за 1,1 тысяч аб'ектаў (11,9%), у Берасцейскай - 467 (4,9%), Гомельскай - 359 (3,7%), Віцебскай - 342 (3,6%), Гарадзенскай - 322 (3,3%), Магілёўскай - 279 (2,9%). Найбольшая колькасць крам (каля 1,6 тыс) рэалізуе электратавары, 857 - будматэрыялы, 806 - тэлерадыётавары, 773 - вылічальную тэхніку, 613 - інструменты.