Дні Індыі ў Менску: танцы, ёга, прысмакі і шмат хны
11- 16.08.2014, 21:39
- 16,718
Ужо каля цэнтральнага ўваходу ў парк Горкага пачынае адчувацца прыемны водар і чутная індыйская музыка. Тыя, хто бываў у Індыі, адчуваюць дэжавю, цікаўныя паскараюць крок.
Пасольства Індыі сумесна з Аддзелам культурна-масавых мерапрыемстваў УП «Гарадскія паркі Мінскзялёнбуда» праводзяць 16 жніўня «Фестываль індыйскай культуры ў Беларусі», пішуць «Беларускія навіны».
Ля самога ўваходу усім жадаючым ставяць біндзі - знак праўды, каляровую кропку, якую індыянкі традыцыйна малююць у цэнтры ілба, так званы «трэцяе вока». Раней біндзі насілі толькі замужнія жанчыны, сёння ж «трэцяе вока» можа дазволіць любы жадаючы.
На галоўнай сцэне бесперапынна змяняюць адзін аднаго розныя танцавальныя калектывы. «Падрыхтоўка да мерапрыемства ішла блізу месяца, - распавядае Надзея Ількевіч, вядучая мерапрыемства, сітарыстка. - У падрыхтоўцы ўдзельнічалі розныя менскія калектывы, якія займаюцца, напрыклад, танцамі ў паўднёвай і паўночнай індыйскай традыцыі. Такі фестываль праходзіць кожны год, але першы раз ён праводзіцца ў такім фармаце, у парку. 15 жніўня ў Індыі адзначаецца Дзень незалежнасці, дзяржаўнае свята, таму фестываль прымеркаваны да гэтай даты. Важная частка урачыстасцяў - дэманстрацыя культурнай спадчыны Індыі».
Надзея Ількевіч - першая беларуска, якая распачала граць на сітары. Гэта шматструнны музычны інструмент, які выкарыстоўваецца для выканання індыйскай класічнай музыкі. «Першы сітар я купіла даўно, калі да нас толькі пачалі прыязджаць індыйскія выставы, - распавядае Надзея. - Мне проста стала цікава асвоіць гэты інструмент. А калі стала на ім граць, то высветлілася, што ў нас ёсць шмат людзей, якія захапляюцца індыйскай культурай. Бо гэта адна з найстарэйшых культур у свеце, яна з'явілася задоўга да старажытнагрэцкай, старажытнарымскай і іншых еўрапейскіх культур. І ў беларусаў, мне здаецца, індыйская філасофія прыцягвае тым, што з'яўляецца асновай асноў, у ёй можна адкрыць для сябе шмат новага».
Адначасова з танцамі, музыкай і паказамі традыцыйных нарадаў, у парку праходзяць майстар-класы ў ёзе і аюрведычнай кухні. І сярод беларусаў шмат жадаючых як размяцца, так і навучыцца правільна гатаваць.
«Мы падышлі да месца, дзе вялася медытацыя, але там неяк вельмі ціха нешта расказвалі і мы нічога не зразумелі, - распавялі Даша і Таня, якія прыйшлі на фестываль. - А потым мілыя хлопцы паклікалі нас на ёгу, і яшчэ будзе майстар-клас аюрведычнай кухні, туды мы таксама пойдзем. Індыйская культура вельмі цікавая. І нам яна даволі блізкая, на самай справе. У іх цудоўная філасофія, вельмі спакойная. Іх спакой, ачышчэнне, шчасце - гэта тое, чаго, напэўна, не хапае беларусам, але да чаго мы цягнемся».
Самыя вялікія чэргі, мабыць, сфарміраваліся ў латкоў з індыйскімі прысмакамі і ля столікаў, дзе ўсім жадаючым малявалі на целе ўзоры хной. Тут ужо даводзілася заплаціць - напрыклад, размаляваная рука абыходзіцца прыкладна ў 50 000 рублёў. Але кошты нікога не напалохалі.
«Фестываль нас зацікавіў, але больш за ўсё, вядома, зацікавіў роспіс хной, - прызнаюцца Іра і Паліна, з упрыгожанымі ўзорамі рукамі. - Як толькі зайшлі ў парк, узялі сцяжкі Індыі і адразу пайшлі туды, дзе размалёўваюць цела. Тут вельмі атмасферна, цікава, грае музыка, шмат людзей у нацыянальнай індыйскай адзежы. Узоры нам наносілі нядоўга, хвілін 20 можа быць. Затое зараз яны нам будуць нагадваць пра фэст мінімум два тыдні. Прынамсі, так абяцаюць дзяўчыны, якія іх рабілі».