За вывешванне сцяга Украіны ў Маскве хочуць пакараць блогера з Кіева
15- 20.08.2014, 14:40
- 20,587
Праваахоўныя органы Масквы распачалі крымінальную справу за вывешванне ўкраінскага сцяга на гмаху.
Пра гэта паведамляе прэс-служба маскоўскай паліцыі.
Паводле папярэдніх звестак, да ўсталявання сцяга на вяршыні гмаха на Кацельнічэскай набярэжнай у Маскве, а таксама да размалёўкі зоркі ў колеры ўкраінскага сцяга датычны кіеўскі блогер і руфер Рыгор, вядомы пад нікам mustangwanted8. Цяпер ён і яшчэ трое падазраваных затрыманыя і дастаўлены ў аддзел паліцыі на Таганцы. Ім інкрымінуюць крымінальную справу паводле артыкула "Вандалізм".
Са звестак відавочцаў, альпініст усю ноч перафарбоўваў зорку і рана-раным спусціўся ў двор з даху гмаху на парашуце. Кадры ўдалося зняць аднаму з жыхароў дома.
Са слоў супрацоўніка паліцыі, 20 жніўня былі затрыманыя чацвёра падазраваных - дзве дзяўчыны і двое мужчын. Ім пагражае да трох гадоў пазбаўлення волі.
Нагадаем, сёння ноччу на адным з самых высокіх будынкаў Масквы вывесілі сцяг Украіны і перафарбавалі зорку ў жоўта-сіні колер. Гаворка ідзе пра гмах на Кацельнічэскай набярэжнай расейскай сталіцы, паведамляюць інфармацыйныя агенцтвы. "Там быў вывешаны таксама ўкраінскі сцяг. Пра гэта ў паліцыю паведамілі відавочцы. Цяпер на месцы працуюць супрацоўнікі паліцыі і МНС. У будынак нікога не пускаюць", - гаворыцца ў паведамленні.