Маці расейскага дэсантніка - украінцам: Выбачайце яму, выбачайце мяне

Маці дэсантніка Іллі Максімава, які знік падчас баявых дзеянняў у Данбасе, выбачылася перад грамадзянамі Украіны.

Аб гэтым піша расейскае агенцтва «Свободные новости».

Кіраўніца саратаўскага «Звязу мацярок жаўнераў» Лідзія Свірыдава не ведае, які лёс чакае расейскіх вайскоўцаў, якія ўдзельнічаюць у баявых дзеяннях ва Украіне. Пра гэта яна сказала на сённяшняй прэс-канферэнцыі, прысвечанай сітуацыі вакол меркаванай загубы і палону ва Украіне расейскіх дэсантнікаў.

На яе думку, пакуль незразумела, як будуць ставіцца да ветэранаў гэтых баявых дзеянняў, якія вернуцца. Фактычна, заявіла Свірыдава, яны сталі закладнікамі палітычнай сітуацыі. Яна таксама параіла бацькам зніклага дэсантніка Іллі Максімава ехаць у Пскоў «дамагацца праўды» ў кіраўніцтва мясцовай дэсантнай дывізіі, а калі яны будуць бараніць версію пра вучэнні пад Растовам, адправіцца туды самім.

У сваю чаргу маці дэсантніка Любоў Максімава выбачылася перад Украінай і яе грамадзянамі за ўдзел свайго сына ў баявых дзеяннях. «Калі Ілля і вінаваты перад Украінай і яе грамадзянамі, я прашу дараваць яму. Ён - чалавек вайсковы, жыве паводле статуту, калі ён у вас, я гатовая прыехаць і яго забраць. Выбачайце яму, выбачайце мне», - сказала яна.

Падрахоўваючы мерапрыемства, Лідзія Свірыдава заклікала бацькоў расейскіх вайскоўцаў пераканацца ў тым, што яны жывыя.

«Гульні скончыліся. Сёння знайдзіце свайго сына ў войску. Пераканайцеся, што ён служыць там, куды ён адправіўся. Сёння вы павінны далей закінуць свае рондалі і хатнія справы і прысвяціць час пошуку свайго сына», - заклікала грамадзян актывістка і падзякавала ўдзельнікам і арганізатарам прэс-канферэнцыі, якія сталі «для сям'і Максімавых адзінай апорай».

Пасля гэтага Свірыдава зрабіла невялікую рэмарку, заявіўшы, што гатовая разам з іншымі грамадскімі актывістамі выехаць ва Украіну «з прабачэннямі» для перамоваў з міністрам абароны. Па вяртанні разам з вызваленымі дэсантнікамі яна паабяцала дамагацца расследавання таго, як вайскоўцы адной дзяржавы апынуліся на тэрыторыі іншай, і пакарання вінаватых.

Нагадаем, 21 жніўня ўкраінскія журналісты выклалі ўскосныя довады прысутнасці расейскіх вайскоўцаў ва Украіне - фатаграфіі, на якіх адлюстраваныя дакументы, спісы байцоў, амуніцыя ды іншыя прадметы. Як мяркуецца, яны належалі байцам пскоўскай дывізіі ПДВ. Сярод знаходак было пасведчанне кіроўцы на імя Іллі Максімава.

25 жніўня стала вядома, што пад Псковам прайшлі закрытыя пахаванні некалькіх байцоў ПДВ. Відавочцы паведамілі, што на цырымонію дапускалі толькі блізкіх сяброў і сваякоў. Пазней выданне «Пскоўская губерня» апублікавала фатаграфіі двух магіл. 26 жніўня ў СМІ з'явіліся і іншыя шматлікія фатаграфіі з могілак у вёсцы Выбуты.

Інфармацыя пра тое, што расейскія вайскоўцы ўдзельнічаюць у баявых дзеяннях на тэрыторыі Украіны прыкладна з сярэдзіны жніўня пачала паступаць з розных рэгіёнаў РФ. З'явіліся звесткі аб загубе дэсантнікаў з Улан-Удэ, рэспублікі Дагестан, а таксама аб траплянні ў палон байцоў 98-й Свірскай дывізіі ПДВ, якая базуецца ў Кастраме.

Мінабароны ўдзел ВС РФ у канфлікце на ўсходзе Украіны адмаўляе. Пры гэтым 26 жніўня ва ўстанове заявілі, што трапілі ў палон за 15 кіламетраў ад мяжы кастрамской дэсантнікі заехалі ва Украіну выпадкова - падчас вучэнняў.

Фота са старонкі Іллі Максімава ў «Вконтакте».