Фотафакт: Катэдж, за які арыштавалі «дэпутата» Шарэйку

Журналісты адшукалі ў Віцебску катэдж, за які была арыштаваная «дэпутат» Ганна Шарэйка.

Паводле афіцыйнага паведамлення Генеральнай пракуратуры, былы дырэктар віцебскай бройлернай птушкафабрыкі, пазбаўленая «сенатарскай» недатыкальнасці, Ганна Шарэйка прычыніла прадпрыемству матэрыяльную шкоду ў асабліва буйным памеры - больш за 4 млрд рублёў, «у сціснутыя тэрміны пабудаваўшы катэдж плошчай 240 квадратных метраў і забяспечыўшы сабе дабрабыт на будучыню».

Але знайсці той самы катэдж аказалася няпроста: адкрытыя крыніцы падаюць у якасці адрасу Ганны Шарэйкі вёску Вярхоўе, дзе размяшчаецца птушкафабрыка, якой яна кіравала, паведамляе «Радыё Свабода».

Знешні выгляд прадпрыемства адразу звяртае на сябе ўвагу: адчуваецца, што доўгія гады пра яго клапаціліся па-гаспадарску. Тэрыторыя прыбраная, дэкаратыўныя кусты пастрыжаныя роўна, будынкі белага колеру, побач апрацаваныя палі ... Сталовая для работнікаў пад назвай «У Ганны» - у гонар вядомага гандлёвага брэнда птушкафабрыкі - выглядае не горш за гарадскую кавярню. На адным баку шыльды над прахадной - надпіс «Віцебская бройлерная птушкафабрыка», а на ўнутранай, якую бачаць работнікі, ідучы са змены, - «Дзякуй за працу!».

Аб былым дырэктары тутэйшыя работнікі распавядаць не хочуць - відавочна, пабойваюцца. Кажуць, што апошнія два працоўныя тыдні Ганна Шарэйка была, па сутнасці, пад хатнім арыштам: яе ўсюды суправаджалі невядомыя - ці то ахоўнікі, ці то канваіры... Але дома ў Вярхоўі ў яе няма. Па вялікім сакрэце пажылая жанчына раіць, як знайсці ў Віцебску той самы катэдж, які фігураваў у паведамленні пракуратуры.

Трохпавярховы домік сучаснага архітэктурнага дызайну крыецца ў самым канцы вуліцы за высокімі дрэвамі і не нашмат ніжэйшым плотам. Ён выразна адрозніваецца і ад суседніх дамоў. Бліжэйшая суседка тут жа хаваецца за дзвярыма свайго дома, не захацеўшы мець стасункі, і паказвае на відэакамеры - іх на катэджы Ганны Шарэйкі некалькі штук.