Пуцін прысвяціў вайне ва Украіне менш за 3% сваёй прамовы ў Менску

Прэзідэнт Расеі Уладзімір Пуцін падчас сустрэчы ў Менску прысвяціў вайсковаму канфлікту ва Украіне менш за 3% сваёй прамовы.

Гэта вынікае з тэксту, што размешчаны на сайце Крамля, піша Украінская праўда.

Так, з агульнага аб'ёму, які складае 1165 слоў, Пуцін ускосна згадаў пра сітуацыю на ўсходзе Украіны толькі ў самым канцы прамовы, прысвяціўшы гэтаму толькі 33 словы, гэта значыць 2,83%.

У гэтым пасажы ён традыцыйна заклікаў «звярнуць увагу на надзённыя інтарэсы жыхароў паўднёва-ўсходніх рэгіёнаў» і да мірных перамоваў з імі.

Астатнюю прамову ён прысвяціў развагам пра эканоміку і крытыку намераў Украіны ратыфікаваць пагадненне аб асацыяцыі з ЕЗ.

У сваю чаргу карэспандэнтка Associated Press Наталля Васільева, якая прысутнічала на сустрэчы, у сваім Твітары адзначыла, што такім чынам Пуцін «ігнаруе слана ў пакоі».

Як вядома, Пётр Парашэнка мяркуе, што на гэтай сустрэчы ў Менску вызначаецца лёс Еўропы і ўсяго свету.