Сяргей Крывец: Гэта было маёй марай - выступаць у еўрапейскай топ-лізе

Экс-паўабаронца БАТЭ Сяргей Крывец, які 28 жніўня перабраўся ў шэрагі французскага "Меца", распавёў аб матывах сваёй пастановы.

"Гэты пераход даўся мне вельмі нялёгка. У БАТЭ ўсё складалася выдатна, мы прабіліся ў групавы раунд Лігі чэмпіёнаў, атрымалі фантастычныя эмоцыі. Цяжка было прыняць пастанову пакінуць Барысаў. Але я ўважаю гэты крок за правільны.

Вызначальным фактарам для мяне быў ўзровень чэмпіянату. Гэта было маёй марай - выступаць у еўрапейскай топ-лізе. І калі выпаў такі шанец, я не мог ім не скарыстацца. Уважаю французскі чэмпіянат за адзін з мацнейшых у свеце. Да таго ж "Мец" выяўляў вялікую зацікаўленасць у маіх паслугах. Як мне растлумачылі, за мной сачылі цягам некалькіх гадоў. Гэта шмат што значыць.

Мне цяжка пакідаць БАТЭ з яго класным калектывам і выдатнымі заўзятарамі. Як бы банальна ні прагучала, заўсёды адчуваў сябе тут, як у сям'і. Хацеў бы падзякаваць усім, хто падтрымліваў мяне. Гэта адчувалася і дапамагала мне і ў жыцці, і на футбольным полі. Дзякую хлопцам, трэнерам, работнікам клуба. Шчыра дзякую Анатолю Анатольевічу Капскаму, які з тагачасным галоўным трэнерам Віктарам Міхайлавічам Ганчарэнкам год таму паверылі ў мяне пасля вяртання з Кітая, дзе я перажыў не найлепшы этап у кар'еры. Стараўся не падмануць гэтых людзей, апраўдаць давер. Дзякую Аляксандру Уладзіміравічу Ермаковічу, з якім мне выдатна працавалася ў гэтым сезоне.

Думаю, і без мяне каманда выканае ўсе пастаўленыя задачы – здабудзе чэмпіёнства і паспяхова выступіць у групе Лігі чэмпіёнаў. Ну і ў выпадку перамогі ў вышэйшай лізе спадзяюся атрымаць запрашэнне на ўрачыстае ўшанаванне - на залаты медаль я напэўна нагуляў.

БАТЭ для мяне больш, чым клуб. Спадзяюся калі-небудзь зноў прымераць яго футболку. Тут я перажыў шмат выдатных імгненняў, якія назаўсёды застануцца ў сэрцы", - падае словы Крыўца афіцыйны сайт БАТЭ.