Ізраіль і палестынцы дамовіліся аб новым замірэнні
- 5.08.2014, 9:03
- 3,028
Ізраіль і палестынскія групоўкі пагадзіліся прыняць план Егіпта, які прадугледжвае спыненне агню ў сэктары Газа на тры дні.
Пагадненне аб спыненні агню ўвойдзе ў дзеянне а 08:00 паводле мясцовага часу ў аўторак, перадае BBC.
У панядзелак Ізраіль у аднастароннім парадку увёў сваё ўласнае замірэнне на 7 гадзін, аднак затым аднавіў баявыя дзеянні.
З пачатку апошняга выбуху гвалту стораны не раз абвяшчалі аб ўзаемным або аднастароннім спыненні агню, але гэтыя замірэнні кожны раз зрываліся.
Апошняе лікам спыненне агню абмяркоўвалася ў панядзелак у Каіры рознымі палестынскімі групоўкамі без удзелу Ізраіля. Пазней прадстаўнік Ізраіля паведаміў: "Ізраіль згодны прыняць праект егіпецкай прапановы аб увядзенні замірэння без папярэдніх умоў на тэрмін 72 гадзіны".
Пра гэта ж заявіў і прадстаўнік групоўкі ХАМАС, якая ўтрымлівае ўладу ў сэктары Газа. Егіпет раней ужо прапаноўваў аналагічнае спыненне агню, прапанова аб гэтым была прынятая Ізраілем, але адпрэчаная ХАМАС.
Новае пагадненне таксама прадугледжвае новыя перамовы старон у Каіры.