NATO прапанавалі выкупіць замоўленыя Расеяй «Містралі»
18- 5.08.2014, 12:34
- 16,264
Пастанова аб пастаўцы гелікоптэраносца можа быць перагледжаная ў кастрычніку 2014 года.
Намеснік старшыні камітэта абароны парламэнта Нямеччыны Карл Ламэрс прапанаваў Францыі адмовіцца ад продажу Расеі двух гелікоптэраносцаў "Містраль", а NATO - дапамагчы Парыжу "прыняць слушную пастанову" і выкупіць французскі кантракт альбо ўзяць вайсковыя караблі ў арэнду, паведамляе РБК.
"Лепш позна, чым ніколі", - сказаў дэпутат Бундэстага ў інтэрв'ю газеце The Financial Times, падкрэсліўшы, што адмова Нямеччыны ад будаўніцтва палігона для падрыхтоўкі наземных войскаў на тэрыторыі Расеі (Муліна, Ніжненаўгародская вобласць) з'яўляецца прыкладам для іншых краін, у тым ліку для Францыі.
"У 2010 годзе, калі кантракт [на пастаўку "Містраляў"] быў узгоднены, была зусім іншая палітычная сітуацыя. Цяпер жа, з далучэннем Крыма, Расея парушыла міжнароднае права і правы чалавека. Цяпер не час прадаваць вайсковыя караблі", - заявіў Ламэрс.
Раней амэрыканскія сэнатары Эліёт Энгель, Уільям Кітынг і Майкл Тэрнэр у сваім лісце генэральнаму сакратару NATO Андэрсу Фогу Расмусэну заклікалі Альянс купіць або арандаваць у Францыі гелікоптэраносцы "Містраль", прызначаныя для Расеі. Як выказалі здагадку палітыкі, такі крок прадэманструе прэзідэнту Уладзіміру Пуціну, што хаўруснікі з NATO ніякім чынам не патрываюць ягоныя "безразважныя крокі".
Сэнатары таксама падкрэслілі, што набыццё гелікоптэраносца дасць магчымасць падвысіць патэнцыял NATO ў варунках моцнага скарачэння выдаткаў на абарону шмат якімі краінамі - чальцамі Альянсу.
Францыя будуе для Расеі два дэсантна-гелікоптэрныя караблі класу "Містраль". Кантракт быў падпісаны 17 чэрвеня 2011 года ў рамках Пецярбуржскага міжнароднага эканамічнага форуму. Сума ўгоды складае крыху больш за 1,1 млрд еўраў. Кошт канкрэтна будаўніцтва двух гелікоптэраносцаў - 980 млн еўраў, астатнія выдаткі запланаваныя на адаптацыю тэхнічнай дакумэнтацыі.
Першы з караблёў - "Уладзівасток" - павінен быць пастаўлены ў Расею ў канцы 2014 года. Другі - "Севастопаль" - сыдзе са стапеляў пад канец 2016 года. Кантракт на пастаўку двух караблёў стаў першым пагадненнем аб набыцці вайсковай тэхнікі на Захадзе з часоў раскідання СССР.