МАЗ і КамАЗ не дамовіліся аб аб'яднанні

Перамовы прадаўжаюцца.

Пра гэта заявіў в.а. камерцыйнага дырэктара ААТ «МАЗ» Сяргей Захарэвіч, піша БелаПАН.

«Як вы ведаеце, для прапрацоўкі варыянтаў гэтага супрацоўніцтва на міжурадавым узроўні створана спецыяльная група. Чарговае пасяджэнне гэтай групы запланавана на сярэдзіну жніўня. Складзены план работы паводле формаў супрацоўніцтва - аб'яднання або ўзаемадзеяння», - адзначыў Захарэвіч.

Адказваючы на пытанне, калі чакаць аб'яднання, ён сказаў: «На гэтае пытанне на сёння няма адказу, група працуе, і працуе прадуктыўна».

Перамовы аб аб'яднанні МАЗа і КамАЗа працягваюцца больш за тры гады. За гэты час стораны прайшлі стадыю прынцыповых дамоўленасцяў, пачалі абмяркоўваць дэталі стварэння СП, аднак пасля перамовы зайшлі ў тупік. Першапачаткова планаваўся абмен акцыямі, аднак гэты варыянт не задаволіў улады Беларусі.

У гэты час абмяркоўваецца пытанне стварэння СП «Расбелаўта», куды будуць унесены 75% акцый МАЗа і 49,9% акцый КамАЗа. На канец траўня 2014 года пытанне стварэння СП заставалася адкрытым, адзначаў віцэ-прэм'ер РФ Аркадзь Дварковіч.

Фота: bymedia.net