Пётр Парашэнка: Зона аперацыі ў Данбасе скарацілася на тры чвэрці

Прэзідэнт Украіны заявіў аб звужэнні тэрыторыі, на якой праводзіцца антытэрарыстычная аперацыя.

За апошнія два месяцы яна стала меншай на тры чвэрці. Пра гэта заявіў прэзідэнт Украіны Пётр Парашэнка падчас сустрэчы з кіраўнікамі сілавых устаноў дзяржавы, паведамляецца на ягонай старонцы ў «Твітэры».

«Дзякуючы мужнасці і гераічнасці ўкраінскіх вайскоўцаў, за апошнія два месяцы зона правядзення АТА скарацілася на тры чвэрці», - напісаў Парашэнка.

Гаворачы аб ходзе чарговай хвалі мабілізацыі, прэзідэнт падкрэсліў важнасць строгага выканання заканадаўства і рашучай барацьбы з фактамі карупцыі. Ён звярнуў увагу генеральнага пракурора Віталя Ярэмы і кіраўніка Службы бяспекі Валянціна Налівайчанкі на наяўнасць такіх фактаў.

«Разгледзьце прапанову, каб вайсковыя камісарыяты неслі адказнасць за якасць кадравага складу, які мабілізуюць. Магчыма, мы ўвядзем практыку, калі баявыя афіцэры з фронту, якія атрымалі раны, будуць працаваць у вайсковым камісарыяце, нават на пасадах вайсковых камісараў або іх намеснікаў, а вайсковы камісар на 45 дзён паедзе ва Узброеныя сілы», - прапанаваў Парашэнка.

Прэзідэнт Украіны таксама адзначыў, што правядзенне мабілізацыі дасць магчымасць развязаць пытанне кароткатэрміновых адпачынкаў для вайскоўцаў, якія ўдзельнічаюць у АТА.

Нагадаем, у Радзе нацыянальнай бяспекі і абароны прагназуюць, што ўкраінскія вайскоўцы да зімы 2014 ачысцяць тэрыторыю Данбаса ад сепаратыстаў.