Жыхары Маладзечна абмеркавалі абарону ад прарасейскіх экстрэмістаў
3- 5.08.2014, 20:18
- 10,430
У Маладзечне 4 жніўня прайшоў круглы стол з нагоды Дня салідарнасці з грамадзянскай супольнасцю Беларусі.
У ім узялі ўдзел мясцовыя праваабаронцы, прадстаўнікі палітычных партый, грамадскіх аб'яднанняў і ініцыятыў дэмакратычнай накіраванасці. Аб мерапрыемстве сайту праваабарончага цэнтра "Вясна" распавёў адзін з удзельнікаў праваабаронца Алесь Капуцкі.
Падчас круглага стала абмяркоўвалася сітуацыя з правамі чалавека як у краіне агулам, так і на мясцовым узроўні. Гучалі прапановы аб тым, як больш эфектыўна распаўсюджваць інфармацыю пра палітвязняў праз мясцовы друк і інтэрнэт, у прыватнасці, праз сацыяльныя сеткі. Таксама была нададзеная ўвага апошняму інцыдэнту са збіццём экстрэмісцкімі сіламі актывіста руху "Еўрапейская Беларусь" у электрычцы "Менск-Маладзечна" і абмяркоўваліся магчымыя шляхі процідзеяння распаўсюджванню такіх з'яў у грамадстве. У выніку ўдзельнікі круглага стала наважылі звярнуцца ў праваахоўныя органы з патрабаваннем спынення ў горадзе дзейнасці незарэгістраваных прарасейскіх арганізацый экстрэмісцкага толку.
Фота: spring96.org