«Ляпісы» выканалі гімн Майдану на канцэрце ў Расеі
12- 6.08.2014, 8:26
- 32,549
У Петразаводску адбыўся канцэрт гурта «Ляпіс Трубяцкі», які прайшоў у рамках развітальнага тура калектыву.
«Ляпіс» выканаў гіты за шмат гадоў, у тым ліку і самую скандальную песню, напісаную ім за апошні час - «Ваяры святла», піша karelnovosti.ru.
Яна была напісаная ў канцы 2012-га, а кліп пачалі здымаць восенню 2013-га года - яшчэ да пачатку пратэстных рухаў на Украіне, аднак падабраны відэашэраг афіцыйнага кліпа адназначны - у руках «ваяроў святла» кактэйлі Молатава, вакол іх падпаленыя шыны і барабаны. Іх апанента сімвалізуе драпежная птушка, магчыма - беркут, на баку якіх б'юцца людзі ў форме, са шклянымі шчытамі і паліцэйскімі дубінкамі.
Такім чынам, песня «Ваяры святла» на Украіне стала неафіцыйным гімнам Майдана, і цяпер яе амаль перад кожным футбольным матчам выконваюць фанаты ўкраінскіх футбольных клубаў, катэгарычна антырасейска настроеныя. Музычны трэк, сумешчаны з фотаздымкамі з месца баёў паміж «майданаўцамі» і міліцыяй ў Кіеве карыстаецца асаблівай папулярнасцю ва ўкраінамоўным сегменце інтэрнэту. Зрэшты, з'яўляюцца звесткі, што гэтай песняй падымаюць свой баявы дух і апалчэнцы, што ваююць на ўсходзе Украіны.
Заканчваецца афіцыйны відэакліп, дарэчы, вялікім атамным выбухам, што з улікам таго, як развіваецца ўкраінскі крызіс ужо нават не выглядае сур'ёзным перабольшаннем.