ЕЗ спыняе супрацоўніцтва з РФ у здабычы нафты ў Арктыцы

ЕЗ спыняе надаваць паслугі для РФ у глыбакаводнай выведцы радовішчаў і здабычы нафты

Брусэль, як і абяцаў, апублікаваў новыя санкцыі ў дачыненні да Расеі, якія з гэтага моманту ўвайшлі ў дзеянне. Амбасадары 28 краін ЕЗ у чацвер прынялі пастанову аб увядзенні з 12 верасня дадатковых санкцый у дачыненні да РФ, піша NEWSru.com.

З гэтай пастановы вынікае, што ЕЗ спыняе надаваць паслугі для РФ у глыбакаводнай выведцы радовішчаў і здабычы нафты, у здабычы нафты ў Арктыцы і распрацоўцы сланцавых радовішчаў. На думку экспертаў, прынятыя меры могуць істотна скараціць даходы расейскага бюджэту ад продажу нафты і газу, пры гэтым Расея можа застацца без найважнейшых тэхналогій. Пра гэта яшчэ перад абвяшчэннем падрабязнасцяў заявілі крыніцы агенцтву Bloomberg. У той жа час адзначаецца, што новыя санкцыі не перашкодзяць бурэнню і здабычы на звычайных наземных радовішчах, а таксама на плыткаводдзі і ля берагоў унутраных мораў.

Арктычны шэльф у РФ асвойваюць сумесна «Роснефть» і Exxon «Карморнефтегаз». Нафтавы гігант ExxonMobil яшчэ вясной заявіў аб нязгодзе з санкцыямі супраць РФ, а ў жніўні пачаў разведачнае бурэнне на расейскім участку шэльфа.

Між тым віцэ-прэзідэнт ОАК у эканоміцы і фінансах Дзмітрый Елісееў запэўніў у пятніцу, што абмежаванне запазычанняў карпарацыі на рынках замежнага капіталу не будзе мець істотнага ўплыву на фінансавую дзейнасць карпарацыі, паведамляе ИТАР-ТАСС. З ягоных слоў, «патрэба ў пазыковым капітале карпарацыя цалкам пакрывае за кошт прыцягненняў на рынку капіталу РФ». Асноўны аб'ём запазычанняў карпарацыі прыпадае на банкі з пераважным удзелам дзяржавы - блізу 60%, амаль 20% прыпадае на долю аблігацый, эмітаваных у РФ.

Пра тое, што новыя санкцыі ЕЗ не зробяць істотнага ўплыву на расейскія экспартныя пастаўкі ўзбраення і вайсковай тэхнікі, заявіў журналістам і кіраўнік аб'яднанай дэлегацыі дзяржкарпарацыі «Ростех» на выставе ADEX-2014 Сяргей Гараслаўскі. «Паводле нашых прагнозаў і высноваў, а таксама з улікам існуючых задач імпартазамяшчэння, мы не чакаем істотнага ўплыву (новых санкцый) на нашы экспартныя пастаўкі», - сказаў ён.