Расея размясціла ў Крыме 20 знішчальнікаў
15- 12.09.2014, 15:37
- 10,482
Расейскія знішчальнікі Су-30 ужо базуюцца на аэрадроме ў "Бельбеку" блізу Севастопаля.
Пра гэта паведаміў у інтэрв'ю РІА "Новости" прызначаны акупацыйнай уладай Крыма в.а. губернатара Севастопаля Сяргей Меняйлаў.
Раней "Бельбек" выкарыстоўваўся ў якасці ўрадавага аэрадрома Украіны, там таксама была дыслакаваная частка СПА.
"Новыя самалёты тыпу Су-30 ужо базуюцца на "Бельбек", - сказаў Меняйлаў.
Ён не ўдакладніў колькасць самалётаў, аднак крыніцы выдання паведамляюць аб базаванні да 20 знішчальнікаў.
Меняйлаў нагадаў аб прынятай урадам РФ пастанове пераўтварыць "Бельбек" у аэрадром супольнага базавання, падвойнага прызначэння - вайсковага і грамадскага. Для базавання вайсковых самалётаў там трэба будзе зрабіць дадатковыя стаянкі і пляцоўкі.
Су-30 (паводле кадыфікацыі NATO - Flanker-C) - савецкі/расейскі двухмясцовы шматмэтавы знішчальнік. Створаны на базе вучэбна-баявой мадыфікацыі Су-27УБ шляхам глыбокай мадэрнізацыі.
Прызначаны для кіравання групавымі баявымі дзеяннямі знішчальнікаў пры выкананні задач заваёвы панавання ў паветры, забеспячэння баявых дзеянняў іншых родаў авіяцыі, прыкрыцця наземных войскаў і аб'ектаў, знішчэння дэсантаў ў паветры, а таксама для вядзення паветранай разведкі і знішчэння наземных або надводных мэтаў.