Цэнтрабанк Расеі перастане падтрымліваць рубель

З студзеня 2015 года Банк Расеі спыніць валютныя інтэрвенцыі і пяройдзе да плывучага курса рубля.

Гэта вынікае з праекта Грашова-крэдытнай палітыкі Банка Расеі на 2015 год і перыяд 2016-2017 года, які маецца ў распараджэнні РБК.

«Банк Расеі да канца 2014 закончыць пераход да рэжыму плывучага валютнага курсу. Пасля гэтага ЦБ спыніць выкарыстанне інтэрвалу дапушчальных значэнняў рублёвага кошту бівалютнага кошыка (аперацыйнага інтэрвалу) і адмовіцца ад правядзення рэгулярных валютных інтэрвенцый, накіраваных на згладжванне валютнага курсу», - сказана ў дакуменце.

Паводле планаў ЦБ, дынаміка курсу будзе вызначацца рынкавымі фактарамі, а плывучы курс стане стабілізатарам эканомікі. Так, напрыклад, умацаванне рубля пры росце коштаў экспартаваных тавараў будзе зніжаць рызыкі «перагрэву» эканомікі, а паслабленне рубля надасць падтрымку айчынным вытворцам. «Апроч падвышэння кіравальнасці ставак грашовага рынку вынікам пераходу да рэжыму плывучага курсу стане памяншэнне адчувальнасці эканомікі да замежных шокаў, адаптацыя да якіх будзе адбывацца за кошт змены валютнага курсу», - гаворыцца ў дакуменце.

Пры гэтым ЦБ не чакае, што пераход да плывучага валютнага курсу значна павялічыць валацільнасць курсу рубля, дзякуючы дасягнутай у папярэднія гады высокай ступені гнуткасці курсаўтварэння, адзначаецца ў дакуменце. ЦБ пакіне сабе магчымасць для правядзення валютных інтэрвенцый, але толькі ў выпадку ўзнікнення пагрозы для фінансавай стабільнасці краіны.

У 2014 годзе Банк Расеі праводзіў значныя сумы валютных інтэрвенцый. За першыя сем месяцаў гэтага года ЦБ прадаў валюты на суму $40,9 млрд. Прычым амаль адну чвэрць з гэтай сумы - $11,3 млрд - Банк Расеі прадаў у панядзелак 3 сакавіка пасля таго, як Савет Федэрацыі дазволіў увод расейскіх войскаў на Украіну.

«Пераход да плывучага курсу рубля ніякай рэвалюцыі не павінен здзейсніць, таму што ЦБ свой рух да гэтай мэты праводзіў паступова», - кажа кіраўнік аперацый на валютным і грашовым рынках Металінвестбанка Сяргей Раманчук. На ягоную думку, рынак да плывучага курса гатовы. «Сёння, нягледзячы на мноства фактараў, якія ўплываюць на курс, такіх як струмень навін, геапалітычная напружанасць, пагрозы санкцый і іншае, курс рубля ў дачыненні да замежных валют знаходзіцца ў гандлёвым дыяпазоне ўнутры калідору, які не прадугледжвае ўмяшання ЦБ, - адзначае Раманчук. - ЦБ умешваўся толькі ў межах валютнага калідора». На ягоную думку, гэта з'яўляецца паказчыкам пэўнай сталасці валютнага рынку, таго, што на ім назіраецца баланс попыту і прапановы на валюту, які забяспечваецца рознымі фактарамі.

«Важна, што ЦБ цалкам не сыдзе з валютнага рынку і ў крызісных сітуацыях будзе здольны хутка прыняць нестандартныя захады для падтрымкі курсу, як гэта было 3 сакавіка гэтага года, - разважае галоўны эканаміст Расеі і СНД «Рэнесанс Капіталу» Алег Кузьмін. - Калі крызісу няма, то ЦБ не павінен прысутнічаць на валютным рынку; з аднаго боку, таму што ўсе ўдзельнікі ўжо адаптаваліся да ваганняў курсу, а з другога - адсутнасць інтэрвенцый дазваляе Банку Расеі лепш кантраляваць працэнтныя стаўкі і тым самым лепш кіраваць інфляцыяй».

Згодна з ДКП ЦБ, да канца гэтага года інфляцыя павінна скласці 7,5-8%. У 2015, 2016 і 2017 гадах пры спрыяльным сцэнары - 4,5-5%, 3,7-4,2% і 3,7-4,2% адпаведна.