Генеральны сакратар МКП шакаваная дыскрымінацыяй прафсаюзаў у Беларусі

Рабства ў XXI стагоддзі мала дзе сустрэнеш, заявіла прафсаюзная лідэрка Шаран Бароў.

15 верасня на сустрэчы з кіраўніцтвам і актывістамі беларускіх незалежных прафсаюзаў Генеральная сакратарка Міжнароднай канфедэрацыі прафсаюзаў заявіла, што шакаваная фактамі дыскрымінацыі ў дачыненні да свабодных прафсаюзаў Беларусі, паведамляе БелаПАН.

Сустрэча адбылася ў рамках афіцыйнага візіту Шаран Бароў ў Менск 15-16 верасня. Падчас гутаркі яе ўдзельнікі распавялі Бароў аб сітуацыі з правамі працоўных у Беларусі, а таксама пра факты дыскрымінацыі сябраў свабодных прафсаюзаў на дзяржпрадпрыемствах і арганізацыях. У гутарцы з журналістамі, якая адбылася пасля заканчэння мерапрыемства, генеральная сакратарка МКП адзначыла, што да свайго прыезду яна была ў курсе складанай сітуацыі з незалежнымі прафсаюзамі ў Беларусі, паколькі «вывучала яе яшчэ паводле Міжнароднай арганізацыі працы (МАП)».

«Але я была шакаваная тымі фактамі пагаршэння дыскрымінацыі ў дачыненні да свабодных прафсаюзаў, - сказала Бароў. - Я была здзіўленая наступствамі дэкрэта №9, які тычыцца фактычна прымусовай працы. Я працую ў многіх праблемных рэгіёнах, у тым ліку краінах Персідскага заліва, дзе існуюць сур'ёзныя праблемы ў плане дыялогу з уладамі, але рабства ў XXI стагоддзі - такое нават там мала дзе сустрэнеш».

Кіраўніца МКП падкрэсліла, што «праца - гэта не тавар», ён мае на ўвазе «годнасць чалавека», а «годнасць чалавека абапіраецца на права на працу, свабоду асацыяцый, на рэалізацыю тых дэмакратычных свабодаў, якія павінны пераважаць ў сучасным грамадстве».

У той жа час Бароў было прыемна пачуць, што лідэры незалежных прафсаюзаў, вымушаныя «ўступаць у канфрантацыю з уладамі і адміністрацыяй прадпрыемстваў», зацікаўлены «ў пабудове нармальных эканамічных стасункаў, у развіцці эканомікі краіны, каб яна магла з упэўненасцю глядзець у будучыню».

Кіраўніца міжнароднага прафсаюзнага руху паведаміла, што 16 верасня ёй трэба будзе сустрэцца з намеснікам міністра замежных спраў Беларусі Валянцінам Рыбаковым і намеснікам міністра працы і сацыяльнай абароны Ігарам Старавойтавым. «На сустрэчы з імі я паспрабую адлюстраваць усе пачутыя сёння гісторыі, перадаць усе атрыманыя ўражанні. <...> Я паспрабую данесці да беларускіх уладаў, што рабочыя - сябры прафсаюзаў не з'яўляюцца ўласнасцю наймальнікаў. Наймальнікі і працоўныя павінны знаходзіцца ў стане партнёрскіх стасункаў, менавіта яны прывядуць краіну да здаровага эканамічнага развіцця», - падкрэсліла яна.

Бароў таксама паведаміла, што сёлета ў кастрычніку ў Менску пройдзе семінар МАП у вядзенні калектыўных дамоваў. Акрамя таго, з'явілася ініцыятыва ў пачатку наступнага года правесці ў Менску рэгіянальны семінар з прыцягненнем прафсаюзных арганізацый некалькіх краін, каб абмеркаваць пытанне свабоды асацыяцый. Выбар на беларускую сталіцу ўпала пасля таго, як Менск выступіў перамоўнай пляцоўкай ва ўрэгуляванні ўкраінскага крызісу.

«Мы спадзяемся, што сабраўшы рэгіянальныя сілы прафсаюзнага руху з розных краін менавіта ў Менску, мы зможам абмеркаваць пытанне свабоды асацыяцыяў у шырокім сэнсе гэтага паняцця, а таксама мы паўплываем на сітуацыю на месцы. Калі такі семінар адбываецца ў Беларусі, дзе ёсць парушэнні ў гэтай галіне, можна чакаць, што ў гэтым пытанні будуць зробленыя пэўныя меры», - зазначыла кіраўнік МКП.

Міжнародная канфедэрацыя працы была створаная ў 2006 годзе шляхам аб'яднання Міжнароднай канфедэрацыі свабодных прафсаюзаў (МКСП) і Сусветнай канфедэрацыі працы (ВКТ). У канфедэрацыю ўваходзіць 301 сяброўская арганізацыя, якая прадстаўляе 176 млн рабочых у 155 краінах свету.